Բադրի Պատարկացիշվիլին` որպես հունվարի 5-ին կայանալիք նախագահական ընտրությունների թեկնածու, կարող է շարունակել իր նախընտրական արշավը սահմանադրական մեթոդներով, հայտարարել է Վրաստանի վարչապետ Լադո Գուրգենիձեն։
«Ինչպես բոլորին հայտնի է, այսօրվա դրությամբ Բադրի Պատարկացիշվիլին մնում է նախագահի թեկնածու», - ասել է վարչապետը լրագրողներին։
Ինչպես հաղորդում է «Նովոստի-Գռուզիա» գործակալությունը, Գուրգենիձեն նշել է, որ Վրաստանի սահմանադրական կարգի ուժային տապալման նպատակով դավադրության փաստի վերաբերյալ Գլխավոր դատախազության սկսած հետաքննությունը դեռևս չի արտացոլվել Պատարկացիշվիլու վրա, այդ պատճառով նա կարող է շարունակել իր նախընտրական արշավը։
«Այն իրավական գործողությունները, որոնք սկսվել են և որոնց մասին գլխավոր դատախազի տեղակալը պատմել է մեզ և կշարունակի տեղեկացնել հասարակությանը՝ համապատասխան մակարդակով, դեռևս չեն արտացոլվել նրա՝ որպես թեկնածուի կարգավիճակի վրա։ Այդ պատճառով հաջորդ տասը կամ ութ օրերի ընթացքում նա կարող է շարունակել քաղաքական պայքարը սահմանադրական մեթոդներով», - ասել է Գուրգենիձեն։
Վրաստանի գլխավոր դատախազությունը օրերս հրապարակել է գաղտնի ձայնա-տեսագրություններ, որոնցից հետևում է, որ նախագահի թեկնածու Պատարկացիշվին, իբրև թե, արտահերթ ընտրությունների երկրորդ օրը՝ հունվարի 6-ին, նախապատրաստում էր մասսայական անկարգություններ։ Հետաքննության հավաստմամբ, այս ծրագրի իրականացման նպատակով ՆԳՆ-ի բարձրաստիճան պաշտոնյային՝ աջակցության համար Պատարկացիշվիլին պատրաստ էր վճարել 100 միլիոն դոլար։
Այս ամենի առնչությամբ «Իմեդի» հեռուստաընկերության աշխատակիցներին հղված ուղերձում Պատարկացիշվիլին հաստատել է ՆԳՆ ներկայացուցիչի հետ զրույցի փաստը և նշված գումարը վճարելու պատրաստակամությունը, որպեսզի ուստիկանները չկրակեն հանրահավաքի մասնակիցների վրա։ Պատարկացիշվիլու խոսքերով, ինքը «կարող է փոխել այս իշխանությունը» և կպարտադրի այժմյան ղեկավարությանը՝ հեռանալ։-0-
