Ֆրանսիական «Pernod Ricard»-ը դարձել է GWS գինեգործական ընկերության 100 տոկոս բաժնետերը
«Pernod Ricard» ֆրանսիական ընկերությունը դարձել է Georgia Wines & Spirits (GWS) վրացական գինեգործական ընկերության 100 տոկոս բաժնետերը, հաղորդում է «Նովոստի-Գռուզիա» գործակալությունը։
Ինչպես լրագրողներին տեղեկացրել է GWS-ի Դիտորդական խորհրդի անդամ Գիա Մշվիդոբաձեն, ֆրանսիական ընկերությանն իր բաժնետոմսերն է վաճառել Վրաստանի նախագահի ընդդիմության միասնական թեկնածու Լևան Գաչեչիլաձեն, որը մինչ վերջերս GWS-ի 9 տոկոս բաժնետերն էր։
Բացի այդ, իր մեկ տոկոս բաժնետոմսերը վաճառել է ինքը՝ Գիա Մշվիդոբաձեն։
Նրա խոսքերով, գործարքի գումարը դեռևս չի հրապարակվում, սակայն մոտ ժամանակներս կհրապարակվի հատուկ պատշոնական հրատարակությունում։
Ինչպես ավելի վաղ հայտարարել էր ինքը՝ Լևան Գաչեչիլաձեն, «Ես ընդունել եմ այս որոշումը՝ իմ նախընտրական հիմնադրամը համալրելու համար։ Նաև ես չէի ցանկանում ունենալ շահերի բախում, երբ դառնամ Վրաստանի նախագահ»։
GWS-ը գինի է արտադրում երկու ապրանքանիշով՝ «Ձվելի Թբիլիսի» և «Թամադա», և ընկերության արտադրության շուրջ 90 տոկոսը արտահանվում է, ընդ որում արտահանման կեսը բաժին էր ընկնում Ռուսաստանին՝ մինչև Մոսկվայի կողմից վրացական գինու ներկրումն արգելելը։
Այս պահի դրությամբ ընկերությունն արտադրում է շուրջ 1 միլիոն շիշ գինի, որոնք արտահանվում են Թուրքիա, Անգլիա, Ճապոնիա, Կանադա, Շվեդիա և այլ երկրներ։-0-
