ԵՐԵՎԱՆ, 21 օգոստոսի. /Նովոստի-Արմենիա/.ՌԴ Կարելիա երկրամասի Կոնդոպոգա քաղաքի դատարանը երեքշաբթի կքննի այդ քաղաքում 2006 թ. սեպտեմբերին իրագործված հակակովկասյան անկարգությունների մասնակիցների դեմ հարուցված քրեական գործը։
Ինչպես «ՌԻԱ Նովոստիին» տեղեկացրեց պետական մեղադրողի ներկայացուցիչ Նատալյա Միխայլովան, մեղադրյալի աթոռին են Կոնդոպոգայի տասներկու բնակիչներ, որոնք մեղադրվում են քաղաքային ու մասնավոր սեփականության, այդ թվում՝ Կովկասից եկածների առևտրական կետերի հրկիզման և ավերման մեջ։ Որպես տուժած՝ գործով անցնում է 4 մարդ։
Երեքշաբթի Կոնդոպոգայի քաղաքային դատարանում տեղի կունենա առաջին բաց լսումը՝ գործն ըստ էության քննելու համար։
«Դատական նիստի ընթացքում կարող են ներկայացվել փաստաբանների միջնորդությունները, եթե ամեն ինչ ընթանա ըստ ծրագրի, ապա մենք նախատեսում ենք հրապարակել մեղադրական եզրակացությունը և հարցաքննել տուժածներին», - ասել է Միխայլովան։
Կարելիայի դատախազության տվյալներով, 2006 թ. սեպտեմբերի 2-ին Կոնդոպոգայում տեղի ունեցած մասսայան անկարգություններին մասնակցել է ավելի քան 100 մարդ։ Նրանցից մեծամասնությունը ենթարկվել է վարչական պատասխանատվության։
Անկարգությունները հրահրվել են տեղի բնակիչների և կովկասցիների միջև տեղի ունեցած մասսայական ծեծկռտուքի պատճառով, ինչի արդյունքում երկու մարդ սպանվել է, ևս ինը ստացել են վնասվածքներ։ Այս հանցանքում մեղադրվող, Կովկասից եկած վեց հոգու հանդեպ հարուցված քրեական գործն այժմ քննվում է Կարելիայի Գերագույն դատարանում։
Բացի այդ, Կարելիայի դատախազությունը քննում է ոստիկանության երեք աշխատակիցների հանդեպ հարուցված քրեական գործը, որոնք մեղադրվում են անփութության մեջ, քանի որ միջոցներ չեն ձեռնարկել՝ ծեծկռտուքի մասնակիցների և վնասարարների հակաօրինական գործողությունների կանխարգելման համար։-0-
