Հայաստանի ԱԳ նախարարը հանդիպել է Վրաստանի իր գործընկերոջը
Հուլիսի 25-ին Վրաստանում աշխատանքային այցով գտնվող ՀՀ ԱԳ նախարար Վարդան Օսկանյանը հանդիպել է Վրաստանի ԱԳ նախարար Գելա Բեժուաշվիլու հետ. Այս մասին «Նովոստի-Արմենիա» գործակալությանը տեղեկացրեցին ՀՀ ԱԳՆ մամուլի և տեղեկատվության վարչությունից։
Հաղորդագրության համաձայն, ՀՀ ԱԳ նախարարը գործընկերոջ ուշադրությունը հրավիրել է վերջերս վրացի իրավապահների կողմից Վրաստանի սահմանի ապօրինի անցման, մեղադրանքով ՀՀ քաղաքացիների ձերբակալումների խնդրին: ԱԳ նախարարներն անդրադարձել են նաեւ հայ-վրացական պետական սահմանի սահմանագծման պայմանագրի վերաբերյալ բանակցություններին:
Հարեւան երկրների ԱԳ նախարարները քննարկել են քաղաքական, տնտեսական եւ մշակութային ոլորտներում երկկողմ համագործակցությանը վերաբերող հարցեր: Զրուցակիցները քննարկել են նաեւ տարածաշրջանային հարցեր, ինչպես նաեւ անդրադարձել միջազգային կազմակերպություններում գործակցության հարցերին:
Խոսելով տարածաշրջանում առկա հակամարտությունների կարգավորման հեռանկարների մասին` նախարար Օսկանյանը ներկայացրել է Լեռնային Ղարաբաղում ժողովրդավարական գործընթացները եւ ԼՂ հակամարտության խաղաղ կարգավորման շուրջ վերջին զարգացումները: Գելա Բեժուաշվիլին ներկայացրել է Աբխազիայի հակամարտության կարգավորման վերաբերյալ վրացական կողմի մոտեցումներն ու Հարավային Օսիայի խնդրի միջազգայնացմանն ուղղված քայլերը:-0-
