Սամվել Բաբայանի վերաքննիչ բողոքը վարույթ է ընդունվել

ԵՐԵՎԱՆ, 4 ապրիլի. /Նովոստի-Արմենիա/. ԼՂՀ պաշտպանության բանակի նախկին հրամանատար Սամվել Բաբայանի փաստաբանը վերաքննիչ բողոք էր ներկայացրել Բաբայանի կալանավորումը անհիմն համարելու մասին։

Վերաքննիչ քրեական գործերով դատարանի բողոքն ընդունել է վարույթ, հայտնում է Aysor.am–ը։

Բաբայանի փաստաբան Ավետիս Քալաշյանը ռեսուրսին ասել է, որ առայժմ նիստի օրվա և ժամի մասին ծանուցում չկա։

«Սպասում ենք», - ասաց փաստաբանը։

Ավելի վաղ փաստաբանն Aysor.am-ին ասել էր, որ Վերաքննիչ դատարանին ներկայացրած բողոքում պնդել է, որ Սամվել Բաբայանին կալանավորելու համար չկան հիմնավոր կասկածներ, և առաջին ատյանի ընդունած որոշումը անհիմն է։


Հայաստան Վրաստանից «Իգլա» տեսակի զենիթա-հրթիռային համալիր տեղափոխելու փաստի առթիվ ԱԱԾ-ում հարուցված քրեական գործի շրջանակներում կալանավորվել է երեք անձ, որոնցից հայտնի են միայն երկուսը՝ Սամվել Բաբայանը և նրա մարտական ընկեր Սանասար Գաբրիելյանը:

Նրանց բոլորին առաջադրվել է մեղադրանք ՀՀ Քրեական օրենսգրիք 235 հոդվածի 2-րդ մասի հատկանիշներով՝ «Նախնական համաձայնությամբ ապօրինի կերպով զենք, ռազմամթերք, պայթուցիկ նյութեր կամ պայթուցիկ սարքեր ձեռք բերելը, իրացնելը, պահելը, փոխադրելը կամ կրելը» և 235.1. հոդվածի 2-րդ մասի 1-ին կետի հատկանիշներով՝ «Նախնական համաձայնությամբ Եվրասիական տնտեսական միության մաքսային սահմանով կամ Հայաստանի Հանրապետության պետական սահմանով խիստ ներգործող, թունավոր, պայթուցիկ, ռադիոակտիվ նյութերի, ճառագայթման աղբյուրների, միջուկային նյութերի, հրազենի կամ նրա բաղկացուցիչ մասերի, ռազմավարական տեսակետից կարևոր հումքային ապրանքների կամ մշակութային արժեքների մաքսանենգությունը»: -0-