Ռուսաստանից Հայաստան իրականացված փոխանցումները մարտին աճել են 1.3 տոկոսով

ԵՐԵՎԱՆ, 2 մայիսի. /Նովոստի-Արմենիա/. Հայկական բանկային համակարգի միջոցով ֆիզիկական անձանց անունով ոչ առևտրային նպատակով Ռուսաստանից Հայաստան իրականացված մասնավոր փոխանցումները 2016 թ.–ի մարտին կազմել են մոտ 59,3 մլն դոլար` մեկ ամսում ավելանալով 1.3 տոկոսով։

Ընդ որում, Ռուսաստանից Հայաստան դրամական փոխանցումները, 2015 թ.-ի մարտի համեմատ, նվազել են 2.8 տոկոսով:

Հայաստան իրականացված դրակաման փոխանցումները 2015 թ.-ի ընթացքում նվազել են 30 տոկոսով` կազմելով 1 208,47 մլն դոլար:

Մասնավոր փոխանցումների կրճատումը հիմնականում պայամանավորված է ռուբլու հսկայական արժեզրկման հետևանքով ռուսական դրամական փոխացումների նվազմամբ: Ռուսաստանից հանրապետություն իրականացված դրամական փոխանցումները 2015 թ.-ին նվազել են 36,1 տոկոսով` կազմելով 915,9 մլն դոլար:

Չնայած Ռուսաստանից դրամական փոխանցումների զգալի կրճատմանը, նրանց մասնաբաժինը հանրապետություն իրականացված փոխանցումների համախառն ծավալում գերիշխող է մնացած երկրների շրջանում: Հանրապետություն իրականացվող մասնավոր փոխանցումների համախառն ծավալում ռուսաստանյան փոխանցումների մասնաբաժինը հաշվետու ժամանակահատվածում կազմել է մոտ 55 տոկոս:

Հատկանշական է, որ մարտին Հայաստանից Ռուսաստան դրամական միջոցների արտահոսքը, նախորդ ամսվա համեմատ, աճել է 1 տոկոսով, իսկ նախորդ տարվա մարտի համեմատ` 47.7 տոկոսով` կազմելով 35.3 մլն դոլար:

Այսպիսով, Ռուսաստանից Հայաստան մասնավոր փոխանցումների զուտ ներհոսքը կազմել է ընդամենը 23,9 մլն դոլար, ինչը 1,9 տոկոսով ավել է նախորդ ամսվա ցուցանիշից, բայց 35.3 տոկոսով քիչ է 2015 թ.-ի համարժեք ժամանակահատվածի ցուցանիշից:

2016 թ.-ի մարտին հանրապետություն իրականացված դրամական փոխանցումների ծավալը կազմել են ավելի քան 107.9 մլն դոլար` մեկ ամսում աճելով 1 տոկոսով և նվազելով 4.6 տոկոսով` 2015 թ.-ի մարտի համեմատ: -0-