ԵՐԵՎԱՆ, 23 օգոստոսի. /Նովոստի–Արմենիա/. 2015-ի հունվարի 12-ին Գյումրիում Ավետիսյանների ընտանիքի յոթ անդամների սպանելու մեջ մեղադրվող Վալերի Պերմյակովն իր պատիժը կրելու է ոչ թե Հայաստանում, այլ կուղարկվի Ռուսաստան, գրում է «Ժողովուրդ» թերթը։
Շիրակի մարզի ընդհանուր իրավասության դատարանում այսօր կհրապարակվի 2015-ի հունվարի 12-ին Գյումրիում Ավետիսյանների ընտանիքի յոթ անդամների սպանելու մեջ մեղադրվող, Ռուսաստանի՝ Գյումրիում տեղակայված 102-րդ ռազմաբազայի զինծառայող Վալերի Պերմյակովի դատավճիռը։ Ինչպես սպասվում է՝ նա կդատապարտվի ցմահ ազատազրկման։
Ըստ «Ժողովուրդ» օրաթերթի տեղեկությունների, Պերմյակովն ուղարկվելու է ՌԴ՝ պատիժների կրման համար նախատեսված հաստատություն։
«ՀՀ և ՌԴ իշխանությունները, շատ լավ գիտակցելով, որ Պերմյակովին Ռուսաստան տեղափոխելը Հայաստանում կարող է դժգոհության նոր ալիք բարձրացնել, քննարկում են զինվորին ՀՀ քաղաքացի, 2013 թ, հուլիսի 13-ի ՌԴ-ում դժբախտ պատահարի համար կալանավորված ավտոբուսի վարորդ Հրաչյա Հարությունյանի հետ «փոխանակելու» տարբերակը»,– ասվում է գրառման մեջ։
Ինչպես նշվում է հրապարակման մեջ, նախատեսվում է, որ երբ Պերմյակովին Ռուսաստան տեղափոխեն, անմիջապես կհայտարարվի նաև, որ Հարությունյանը կհանձնվի հայ իրավապահներին։ -0-
Ծանոթացեք լուրերին առաջինն ու քննարկեք դրանք մեր Telegram-յան ալիքում