Նաիրի Հունանյանի վաղաժամկետ ազատման հարցումը մերժվել է

ԵՐԵՎԱՆ, 29 հոկտեմբերի. /Նովոստի–Արմենիա/. Ցմահ դատապարտյալ Նաիրի Հունանյանին վաղաժամկետ ազատելու վերաբերյալ բացասական զեկույց է ստացվել, հայտնում է Հայաստանի արդարադատության նախարարության մամուլի ծառայությունը։

Ավելի վաղ հայտնի է դարձել, որ սեպտեմբերի 11–ին Հունանյանը վաղաժամկետ պայմանական ազատման հայտ է ներկայացրել։ Ըստ օրենքի, հայտի պատասխանը ստացվում է 80 օրվա ընթացքում։

«Հաշվի առնելով 2 ծառայությունների ներկայացրած զեկույցների բացասական լինելու հանգամանքը՝ քրեակատարողական հիմնարկի վարչակազմը 2019 թվականի հոկտեմբերի 28-ին ընդունել է Ն. Հունանյանի՝ պատիժը կրելուց պայմանական վաղաժամկետ ազատելու կամ պատժի չկրած մասն ավելի մեղմ պատժատեսակով փոխարինելու հարցը դատարան չներկայացնելու մասին որոշում»,– ասվում է հաղորդման մեջ։

Նշվում է, որ այն կարող է բողոքարկվել առաջին ատյանի ընդհանուր իրավասության դատարան որոշումն ստանալուց հետո՝ տասնօրյա ժամկետում: -0-