Մահացել է Երևան–Մոսկվա ավտոբուսի ՃՏՊ–ից տուժած`Հայաստանի 49–ամյա քաղաքացին

ԵՐԵՎԱՆ, 26 մարտի. /Նովոստի Արմենիա/. Վորոնեժում Երևան–Մոսկվա ավտոբուսի մասնակցությամբ վթարի զոհերի թիվը հասել է երեքի։

Մարտի 20-ին 09:20-ի սահմաններում Երևան-Մոսկվա երթուղին իրականացնող «Mercedes» մակնիշի 308 AF 61 պետհամարանիշով ավտոբուսը ՌԴ Մ-4 «Դոն» միջպետական ավտոճանապարհի 673-րդ կիլոմետրին՝ Վորոնեժի մարզի Պավլովսկ քաղաքի մոտակայքում, բախվել է բեռնատար ավտոմեքենային. կան զոհեր և տուժածներ:

Պարզվել է, որ ավտոբուսում եղել են 50 ուղևոր և 2 վարորդ (1972 թ. ծնված Տիգրան Բաբախանյան և 1974 թ. ծնված Արկադի Թադևոսյան). մոտ 40 ուղևոր տեղափոխվել է Ռուսաստանի Դաշնության Պավլովսկ քաղաքի մոտակայքում գտնվող «Как дома» հյուրանոց:


Ինչպես հայտնում է ԱԻՆ մամուլի ծառայությունը, Ռուսաստանում գերատեսչության ներկայացուցիչը 14։25–ին հայտնել է, որ հիվանդանոցում մահացել է 1969 թ. ծնված Դավիթ Սարդարյանը։

Ավտոբուսի ուղևոր՝ 1978 թ. ծնված Արտակ Վրեժի Սուքիասյանը և բեռնատարի վարորդը (1961 թ. ծնված Ն. Սիոնին) տեղում մահացել էին: Ավտոբուսի վարորդները և ուղևորներ՝ 1969 թ. ծնված Դավիթ Սարդարյանը, 1988 թ. ծնված Մելիք Հայրապետյանը, 1982 թ. ծնված Եղիշե Համբարձումյանը, 1964 թ. ծնված Արմեն Մուրադյանը, 1961 թ. ծնված Վարյա Օհանյանը, 1969 թ. ծնված Դավիթ Վերմիշյանը և 1972 թ. ծնված Վազգեն Գևորգյանը հոսպիտալացվել էին Պավլովսկ քաղաքի հիվանդանոց։

Ստացված տեղեկության համաձայն՝ 42 ուղևորները, ովքեր գտնվում էին Պավլովսկ քաղաքի մոտակայքում գտնվող «Как дома» հյուրանոցում, համընթաց ուղղությամբ շարժվող տրանսպորտային միջոցներով շարունակել են իրենց ճանապարհը: -0-