IDeA հիմնադրամը կհոգա Հայաստան տեղափոխված սիրիահայերի վարձակալած բնակարանների ծախսերը

ԵՐԵՎԱՆ, 27 դեկտեմբերի. /Նովոստի-Արմենիա/. IDeA-ի տրամադրած միջոցներով «Առաքելություն Հայաստան» կազմակերպությունը 2017 թ. հունվարից կսկսի հոգալ Հայաստան տեղափոխված սիրիահայերի համար բնակարանների վարձակալության ծախսերը, հաղորդում է IDeA հիմնադրամի մամուլի ծառայությունը:

«Աջակցություն սիրիահայերին» նախաձեռնության շրջանակում, սիրիահայերի կարիքների գնահատման նպատակով, «Առաքելություն Հայաստան» և Repat Armenia կազմակերպություններն անցկացրել են քննարկումներ, մշակել ծրագրեր, որոնց մեկնարկը կտրվի 2017թ.-ի հունվարին:

«Սիրիահայերին աջակցելու IDeA հիմնադրամի կոչին միացել են տարբեր կազմակերպություններ և անհատներ, որոնց նվիրատվությունների ընդհանուր գումարը կազմել է 10 միլիոն 784 հազար դրամ», - նշվում է հաղորդագրության մեջ:

IDeA հիմնադրամի «Աջակցություն սիրիահայերին» նախաձեռնության շրջանակում մինչ օրս Հալեպից Հայաստան է տեղափոխվել 37 սիրիահայ։ «Հալէպ» հայրենակցական բարեսիրական կազմակերպությանը Հայաստան տեղափոխվելու ցանկություն է հայտնել ևս 18 հոգի:

Հոկտեմբերին 15-ին IDeA հիմնադրամը հայտարարել էր սիրիահայերի աջակցության նպատակով 250 հազար ԱՄՆ դոլար հատկացնելու մասին: Այս ֆինանսական հատկացումը բաշխվում է չորս գործընկերների՝ Հայկական Բարեգործական Ընդհանուր Միության, «Առաքելություն Հայաստան» (Mission Armenia) հասարակական կազմակերպության, «Հալէպ» հայրենակցական բարեսիրական կազմակերպության և «Repat Armenia» հիմնադրամի միջև` հետևյալ ուղղություններով ծրագրերի մշակման և իրագործման համար` աջակցություն նրանց, ովքեր շարունակում են մնալ Սիրիայում (ՀԲԸՄ); աջակցություն նրանց, ովքեր ժամանակավոր ապաստան են փնտրում Սիրիայի սահմաններից դուրս (Mission Armenia); աջակցություն նրանց, ովքեր որոշել են տեղափոխվել Հայաստան («Հալէպ»); աջակցություն Հայաստանում ինտեգրվելու ու աշխատանք գտնելու հարցում («Repat Armenia»): -0-