Հռոմի պապ. ես կպատմեմ ադրբեջանցիներին Հայաստանի մասին և խաղաղության կոչ կանեմ

ԵՐԵՎԱՆ, 27 հունիսի. /Նովոստի-Արմենիա/. Հռոմի Ֆրանցիսկոս պապը խոստացել է Ադրբեջան կատարելիք այցի ժամանակ պատմել այն մասին, թե ինչ է տեսել Հայաստանում և ադրբեջանցիներին խաղաղության և կոչ անել:

Կիրակի Պոնտիֆիկոսն ավարտեց իր եռօրյա այցը Հայաստան: Ավանդության համաձայն, Հռոմի ճանապարհին նա պատասխանեց իրեն ուղեկցող լրագրողների հարցերին:

«Ես կպատմեմ ադրբեջանցիներին այն ճշմարտությունը, որ տեսել եմ, այն, ինչ զգացել եմ: Ես հանդիպել եմ Ադրբեջանի նախագահին և զրուցել նրա հետ: Փոքր հողակտորի վրա խաղաղ համաձայնության գալն այդքան էլ բարդ չէ: Ես կասեմ այդ մասին և հայերին, և ադրբեջանցիներին», - ասել է Հռոմի պապը:

Նա ենթադրել է, որ հայերը և ադրբեջանցիները չեն կարողանում համաձայնության գալ խաղաղության հաստատման միջոցների շուրջ, և պետք է աշխատել այդ ուղղությամբ:

«Չգիտեմ` էլ ինչ ասեմ, ուստի ասում եմ այն, ինչ զգում եմ այս պահին` պետք է միշտ փորձել իրականանալի լուծումներ գտնել», - ասել է Հռոմի պապը:

Ի պատասխան այն հարցին, թե որոնք են ապագայի հաղորդագրությունն ու Հայաստանի համար աղոթքը, Ֆրանցիսկոս պապը հույս է հայտնել, որ «արդարություն և խաղաղություն կլինի այս մարդկանց համար», և խոստացել է աղոթել հանուն դրա, «քանի որ, նրանք քաջ մարդիկ են»:

«Ես շատ երջանկացա, երբ նախորդ շաբաթ տեսա նախագահներ Պուտինի, հայ և ադրբեջանցի նախագահների լուսանկարը. ամեն դեպքում, նրանք զրուցում են: Նույնն էլ վերաբերում է Թուրքիային. հանրապետության նախագահը ողջույնի խոսքում պարզ և համարձակ ասաց. «Եկե´ք ձգտենք համաձայնության: Ներենք միմյանց և նայենք դեպի ապագա», - ասել է Հռոմի պապը:

Հունիսի 20-ին Սանկտ Պետերբուրգում տեղի է ունեցել Հայաստանի, Ռուսաստանի և Ադրբեջանի նախագահներ Սերժ Սարգսյանի, Վլադիմիր Պուտինի և Իլհամ Ալիևի եռակողմ հանդիպումը։ Նախագահները հանդիպել են է ՌԴ նախագահի հրավերով և քննարկել Լեռնային Ղարաբաղի հակամարտությունը կարգավորման հարցերը։

Հռոմի պապը խոստովանել է նաև, որ ունի հայ շատ ընկերներ, որոնց հետ ջերմ հարաբերություններ ունի:

Ղարաբաղյան հակամարտությունը սկիզբ է առել 1988 թ.-ին, երբ հիմնականում հայերով բնակեցված Լեռնային Ղարաբաղը հայտարարեց Ադրբեջանի կազմից դուրս գալու մասին։ 1991 թ. դեկտեմբերի 10-ին, Խորհրդային Միության փլուզումից մի քանի օր առաջ, Լեռնային Ղարաբաղում տեղի ունեցավ հանրաքվե, որի ժամանակ բնակչության ճնշող մեծամասնությունը՝ 99,89 տոկոսը Ադրբեջանից ամբողջովին անկախանալու կողմ քվեարկեց։

Դրանից հետո սկսվեցին լայնամասշտաբ ռազմական գործողություններ, որոնց հետևանքով Ադրբեջանը կորցրեց վերահսկողությունը Լեռնային Ղարաբաղի և նրան հարակից յոթ շրջանների նկատմամբ։

1994 թ.-ի մայիսի 12-ին՝ զինադադարի մասին համաձայնագրի ուժի մեջ մտնելուց հետո հակամարտության գոտում դադարեցին ռազմական գործողությունները։ Պատերազմի հետևանքով երկու կողմից զոհվեց մոտավորապես 25-30 հազ մարդ և մոտ մեկ միլիոնը ստիպված եղավ լքել բնակավայրերը։

Զինադադարի ռեժիմի մասին համաձայնությունը պահպանվում է մինչ այժմ։ 1992 թ.-ից մինչ օրս ընթանում են բանակցություններ հակամարտության խաղաղ կարգավորման ուղղությամբ ԵԱՀԿ Մինսկի խմբի շրջանակներում, որի համանախագահներն են ԱՄՆ-ն, Ռուսաստանը և Ֆրանսիան։ -0-