ՀՀ մշակույթի նախարարությունը ծրագրում է արտասահմանյան կինոընկերություններ ներգրավել երկիր

ԵՐԵՎԱՆ, 29 սեպտեմբերի. /Նովոստի–Արմենիա/. Հայաստանի մշակույթի նորանշանակ նախարարը մտադիր է արտասահմանյան կինոընկերություններ ներգրավել երկիր։

Ինչպես նա հայտնեց հինգշաբթի լրագրողներին, իր առաջին քայլերից մեկը կլինի «Կինոյի մասին» օրինագծի առաջխաղացումը։

«Կարծում եմ, որ մենք պետք է որոշակի հարկային արտոնություններ տրամադրենք օտարերկրյա պրոդյուսերական կենտրոններին, որոնք ֆիլմեր կնկարահանեն Հայաստանում, ինչը թույլ կտա ոչ միայն խթանել կինոինդուստրիայի զարգացումը, այլ նաև առավելագույնս ներկայացնել երկիրն արտերկրում»,– ասաց Ամիրյանը։

Նա միաժամանակ նշեց, որ առաջիկայում ծրագրում է հանդիպումներ անցկացնել պրոդյուսերական կենտրոնների հետ և նախագծեր ներկայացնել ռուսական, չինական և իրանական շուկաների համար։

Առավել հեռանկարային շուկան, ըստ նախարարի, Ռուսաստանն է, որտեղ բազմաթիվ պրոդյուսերական կենտրոններ գլխավորում են հայերը։

Որպես իր գործունեության մյուս երկու հիմնական ուղղություններ Ամիրյանը նշեց մշակութային արժեքների համակարգի զարգացման շեշտադրումը և այդ ոլորտում թիրախային ծրագրերի իրագործումը։

Ինչպես նշեց նախարարը, առանցքային մյուս ուղղությունը հրատարակչությունն է, մասնավորապես, երկրում գրախանութների համակարգի զարգացումը։ -0-