Հայաստանի ՊՆ–ն կպայքարի ծխելու դեմ. ծխախոտը հանվում է ԶՈՒ պարենային հատկացումներից

ԵՐԵՎԱՆ, 22 փետրվարի. /Նովոստի–Արմենիա/. Հայաստանի պաշտպանության նախարարությունը պայքարելու է ծխելու դեմ` սահմանափակելով ծխախոտի մատակարարումը։ Համապատասխան որոշումը կներկայացվի կառավարության քննարկմանը հինգշաբթի։

Ինչպես նշվում է կառավարության կայքում տեղադրված որոշման նախագծում, Հայաստանի պաշտպանության նախարարության, Ազգային անվտանգության ծառայության և Արտակարգ իրավիճակների նախարարության համակարգերի խաղաղ ժամանակ պարենային ապահովման չափաքանակներում հանվում է ծխախոտի, իսկ ԱԱԾ-ի մասով` նաև լուցկու հատկացումը:

«Որոշման նախագծի ընդունման անհրաժեշտությունը բխում է ՀՀ Ազգային ժաղովի կողմից 2004 թվականի հոկտեմբերի 12-ին վավերացված 2003 թվականի մայիսի 21-ին Ժնևում ընդունված «Ծխախոտի դեմ պայքարի Առողջապահության համաշխարհային կազմակերպության շրջանակային կոնվենցիայի» պահանջներից (որին միացել են շուրջ 153 պետություն), ինչպես նաև Հայաստանի Հանրապետության ծխախոտի դեմ պայքարի պետական ծրագրի դրույթներից»,– ասվում է նախագծի հիմնավորման մեջ։

Փաստաթղթում նշվում է նաև, որ հաշվի են առնվում նաև վերջին տարիներին Հայաստանի Հանրապետության զինված ուժերում ծխելու դեմ պայքարին ուղղված համալիր միջոցառումները, այդ թվում` ՀՀ պաշտպանության նախարարությունում «Առողջ զինվոր` առանց ծխախոտի» ծրագրի իրականացումը, որոնց գլխավոր առարկան զինծառայողների առողջության պահպանումն է»,- նշվում է որոշման նախագծում:

Որոշումն ուժի մեջ կմտնի 2017 թվականի հուլիսի 1-ից:

Ինչպես Facebook–ի իր էջում Հայաստանի պաշտպանության նախարարության մամուլի քարտուղար Արծրուն Հովհաննիսյանը, 2008թ. շարքային ժամկետային կազմին ծխախոտ չի հատկացվում, դրա փոխարեն հատկացվում է համապատասխան գումար, ինչպես նաև քաղցրավենիք մարտական դիրքերում:

«Նոր օրինագիծը, որն առաջ է քաշել ՀՀ ՊՆ Վիգեն Սարգսյանը, վերաբերում է պայմանագրային զինծառայողներին: Նրանց օրական 20 հատիկ ծխախոտի և համապատասխան լուցկու փոխարեն կհատկացվի համապատասխան գումար: Դա, նախևառաջ, առողջ ապրելակերպին է ուղղված, հետո նա կարող է ինքը տնօրինել իր գումարը, իսկ եթե, այնուամենայնիվ, պիտի ծխի, ապա կծխի իր ուզած ծխախոտը»,– նշել է Հովհաննիսյանը։ -0-