Հայաստանի և Ռուսաստանի նախագահները կքննարկեն ղարաբաղյան կարգավորման հարցեր

ԵՐԵՎԱՆ, 22 օգոստոսի. /Նովոստի–Արմենիա/. Հայաստանի նախագահ Սերժ Սարգսյանն օգոստոսի 23-ին աշխատանքային այցով կմեկնի Սոչի։

Ինչպես հայտնում է հայկական պետության նախագահի մամուլի ծառայությունը, Սոչիում նախագահը հանդիպում կունենա ՌԴ Նախագահ Վլադիմիր Պուտինի հետ:

«Նախատեսվում է, որ երկու երկրների ղեկավարները կքննարկեն մի շարք ոլորտներում՝ քաղաքական, տնտեսական, հումանիտար, մշակութային երկկողմ փոխգործակցության օրակարգի առանցքային հարցեր, ինչպես նաև կանդրադառնան Նախագահ Սերժ Սարգսյանի այս տարվա մարտին Ռուսաստան կատարած պաշտոնական այցի ընթացքում ձեռքբերված պայմանավորվածությունների իրագործման ընթացքին»,– նշվում է հաղորդման մեջ։

Հանդիպմանը նախագահները կարծիքներ կփոխանակեն միջազգային և տարածաշրջանային արդիական հարցերի, այդ թվում՝ Լեռնային Ղարաբաղի հակամարտության կարգավորման շուրջ:

Բացի այդ, բանակցությունների ժամանակ կխոսվի նաև ԵՏՄ և ՀԱՊԿ շրջանակում համագործակցության զարգացման հեռանկարին առնչվող հարցերի մասին։ -0-