Հայաստանը նշանակել է իր առաջին դեսպանին Պակիստանում
ԵՐԵՎԱՆ, 6 հուլիսի․/Նովոստի–Արմենիա/․ ՀՀ նախագահ Վահագն Խաչատուրյանը հրամանագիր է ստորագրել Կարեն Գրիգորյանին Պակիստանում Հայաստանի առաջին արտակարգ և լիազոր դեսպան նշանակելու մասին:
«Հիմք ընդունելով վարչապետի առաջարկությունը` համաձայն Սահմանադրության 132-րդ հոդվածի 1-ին մասի 2-րդ կետի, ինչպես նաև «Դիվանագիտական ծառայության մասին» օրենքի 13-րդ հոդվածի 3-րդ մասի և 14-րդ հոդվածի.
Արաբական Միացյալ Էմիրություններում Հայաստանի Հանրապետության արտակարգ և լիազոր դեսպան Կարեն ԳՐԻԳՈՐՅԱՆԻՆ, համատեղության կարգով, նշանակել Պակիստանի Իսլամական Հանրապետությունում Հայաստանի Հանրապետության արտակարգ և լիազոր դեսպան (նստավայրը՝ Աբու Դաբի)», - նշված է հրամանագրում։
Հայաստանի և Պակիստանի հարաբերությունների մասին
Պակիստանն ավելի քան 30 տարի չի ճանաչել Հայաստանի Հանրապետության անկախությունը, որը հռչակվել էր 1991 թվականի սեպտեմբերին և չի հաստատել դիվանագիտական հարաբերություններ։ Իսլամաբադի նման դիրքորոշման պատճառների թվում է ղարաբաղյան հակամարտության հարցում Ադրբեջանի դիրքորոշման բազմամյա աջակցությունը։
Հայ-ադրբեջանական խաղաղության գործընթացի առաջմղման ֆոնին այս արգելքը վերացվեց. դեռևս 2023 թվականի նոյեմբերին վարչապետ Նիկոլ Փաշինյանը հայտարարում էր, որ Ադրբեջանի հետ խաղաղության պայմանագրի ստորագրումը կդառնա փաստարկ, որը կօգնի դիվանագիտական հարաբերություններ հաստատել, այդ թվում՝ Պակիստանի հետ։ Փաշինյանի խոսքով՝ Հայաստանը ցանկանում է բարեկամական հարաբերություններ հաստատել բոլոր երկրների հետ՝ արտաքին կապերի կարգավորման և տարածաշրջանում խաղաղության օրակարգի առաջմղման ավելի լայն քաղաքականության շրջանակում։
2025 թվականի օգոստոսի 31-ին Հայաստանն ու Պակիստանը հաստատեցին դիվանագիտական հարաբերություններ՝ Տյանցզինում ՇՀԿ գագաթնաժողովի շրջանակում ստորագրելով համապատասխան կոմյունիկե։ Փաստաթղթի տակ իրենց ստորագրություններն են դրել Հայաստանի արտաքին գործերի նախարար Արարատ Միրզոյանը և Պակիստանի փոխվարչապետ, արտաքին գործերի նախարար Մոհամմադ Իսհաք Դարը։
Համաձայն Հայաստանի ԱԳՆ հաղորդագրության՝ կոմյունիկեի ստորագրմամբ երկու երկրների կառավարությունները ցանկություն են հայտնել զարգացնել բարեկամական հարաբերություններ ՄԱԿ-ի Կանոնադրությանը համապատասխան, ներառյալ՝ սուվերենության և տարածքային ամբողջականության փոխադարձ հարգանքի, չհարձակման, միմյանց ներքին գործերին չմիջամտելու, իրավահավասարության, փոխշահավետության և խաղաղ համակեցության սկզբունքները։
Բացի այդ, Հայաստանի և Պակիստանի կառավարությունները պայմանավորվել են ներկայացուցիչների փոխանակման և դիվանագիտական հարաբերությունների հաստատման համար միմյանց անհրաժեշտ օգնության ցուցաբերման մասին՝ փոխադարձության հիման վրա, Դիվանագիտական հարաբերությունների մասին Վիեննայի 1961 թվականի կոնվենցիային և համընդհանուր միջազգային պրակտիկային համապատասխան։
