ԵՐԵՎԱՆ, 18 սեպտեմբերի. /Նովոստի–Արմենիա/. Հայաստան–Սփյուռք «Փոխադարձ վստահություն, միասնականություն և պատասխանատվություն» վեցերորդ համաժողովն է մեկնարկել երկուշաբթի Երևանում։
«Ողջունում եմ ձեզ հայրենիքում։ Այսօր մենք ամփոփում ենք «Հայաստան–Սփյուռք» հինգերորդ համաժողովի արդյունքները, որից անցել է երեք տարի, և մշակում ենք հետագա գործողությունների ծրագիրը», – ողջույնի խոսքում ասաց Հայաստանի սփյուռքի նախարար Հրանուշ Հակոբյանը։
Նրա խոսքով, համաժողովի արդյունքներով, Սփյուռքի նախարարությունը բազմաթիվ ծրագրեր է մշակել։ Աշխատանքներն ուղղված են Հայրենիքի հետ սփյուռքի կապերի ամրապնդմանը։
«Համաժողովը 71 երկրի հայազգի ավելի քան 1800 մասնակից է հավաքել իր հարկի տակ։ Ուրախալի է, որ նրանցից 35 տոկոսը կանայք են, ավելի քան 25 տոկոսը` երիտասարդներ։ Համաժողովին մասնակցում է ավելի քան 90 խմբագիր և լրագրող։ Մեծ պատվիրակություններ են ժամանել Ռուսաստանից, ԱՄՆ–ից, Արգենտինայից, Կանադայից, Լիբանանից, Իրանից, Սիրիայից, Թուրքիայից, Արցախից»,– ասաց Հակոբյանը։
Նա նշեց, որ համաժողովին մասնակցում են պատգամավորներ, նախարարներ, տեղական ինքնակառավարման մարմինների ներկայացուցիչներ տարբեր երկրներից։ Առաջին անգամ համաժողովին մասնակցում են Մալայզիայի, Ճապոնիայի, Մեքսիկայի, Սուդանի ներկայացուցիչներ։ Ավելի քան 250 լրագրող է հավատարմագրվել` համաժողովի աշխատանքը լուսաբանելու համար։
«Օրակարգը շատ հագեցած է, ընդգրկում է Հայրենիքի անվտանգության և պաշտպանության, արտաքին քաղաքականության, տնտեսական զարգացման հարցեր։ Համաժողովը հայտարարում եմ բացված»,– ասաց Հակոբյանը։
Համաժողովը, որը կտևի մինչև սեպտեմբերի 20–ը, նվիրված է Հայաստանի Առաջին հանրապետության հռչակմանը և մայիսյան հերոսամարտերի 100–ամյակին, ինչպես նաև «Էրեբունի–Երևան 2800» տոնին։
Համաժողովին մասնակցում են Հայաստանի և Արցախի գերատեսչությունների ղեկավարներ, փորձագետներ, ինչպես նաև Սփյուռքի ականավոր գործիչներ, այդ թվում` Թուրքիայի խորհրդարանի պատգամավոր Գարո Փայլանը։ Զեկույցներով ելույթ կունենան Բելգիայի, ԱՄՆ–ի, Ռուսաստանի, Արգենտինայի, Լիբանանի, Պորտուգալիայի, Կանադայի, Իրանի, Ռումինիայի, ԱՄԷ–ի և Սիրիայի սփյուռքահայ կառույցների ներկայացուցիչներ։
Բացման արարողությանը ելույթ ունեցան Հայաստանի սփյուռքի նախարար Հրանուշ Հակոբյանը, Ամենայն Հայոց Գարեգին Բ Կաթողիկոսը, այս պահին ելույթ է ունենում Հայաստանի նախագահ Սերժ Սարգսյանը։
Օրակարգում են նաև Արցախի նախագահի, Հայաստանի վարչապետ Կարեն Կարապետյանի, ԱԳ նախարար Էդվարդ Նալբանդյանի, պաշտպանության նախարար Վիգեն Սարգսյանի, Արցախի արտաքին գործերի նախարար Կարեն Միրզոյանի ելույթները։
Առաջին անգամ համաժողովի աշխատանքում առանձնացվել են չորս գլխավոր ուղղություններ` «Հայաստանի զարգացման հիմնական խնդիրները», «Հայաստանի պաշտպանական քաղաքականության առանձնահատկությունները ժամանակակից մարտահրավերների պայմաններում», «Արտաքին քաղաքականության օրակարգը» և «Հայապահպանության հիմնական խնդիրները»։ Այս ուղղություններով աշխատանքը կազմակերպելու համար ընտրվել են պատասխանատու գերատեսչություններ` պաշտպանության, արտաքին գործերի, միջազգային տնտեսական ինտեգրման և բարեփոխումների, ինչպես նաև սփյուռքի նախարարությունները։
Հայաստան–Սփյուռք 6–րդ համաժողովի շրջանակում իրենց նվաճումները կներկայացնեն կրթական հաստատություններ, գինու, կոնյակի և տեքստիլի արտադրողները։ Իր տնտեսական և մշակութային նվաճումները կներկայացնի նաև Արցախը։ -0-
Ծանոթացեք լուրերին առաջինն ու քննարկեք դրանք մեր Telegram-յան ալիքում
