Հայ գինեգործներն աննախադեպ հաջողության են հասել Գերմանիայի հեղինակավոր մրցույթում

ԵՐԵՎԱՆ, 2 մարտի. /Նովոստի–Արմենիա/. Հայաստանն աննախադեպ արդյունքներ է գրանցել փետրվարի 25–ին գերմանական Նոյշտադտ քաղաքում անցկացված MUNDUS VINI 20th Grand International Wine Awards միջազգային մրցույթում։

Ինչպես հայտնում է հանրապետության գյուղատնտեսության նախարարության մամուլի ծառայությունը, մրցույթին մասնակցած հայկական գինեգործական ընկերությունների ներկայացրած արտադրանքն արժանացել է 23 մեդալի՝ 10 ոսկի և 13 արծաթ:

Հայաստանից մրցույթին մասնակցել են 19 գինեգործական ընկերություններ` գնահատող հանձնաժողովի դատին ներկայացնելով 58 տեսակի հանգիստ և փրփրուն գինիներ:

Ընդհանուր առմամբ մրցույթին ներկայացված էին շուրջ 6 000 տեսակի գինիներ աշխարհի 44 երկրներից: Հայաստանն իր նվաճած մեդալների քանակով առաջ է անցել այնպիսի երկրներից, ինչպիսիք են Վրաստանը (4 ոսկի, 7 արծաթ), Մոլդովան (8 ոսկի, 12 արծաթ), Մակեդոնիան (6 ոսկի, 3 արծաթ), Ռումինիան (6 ոսկի, 5 արծաթ), Չինաստանը (1 ոսկի, 1 արծաթ):

Հայաստանը մեդալների թվով կիսել է 14–րդ տեղը Նոր Զելանդիայի և Հունգարիայի հետ։

Ժյուրիի կազմում էին մոտ 200 հեղինակավոր փորձագետներ, այդ թվում, գինեգործ Հայաստանից։

Հայկական գինիները համտեսելու նպատակով «MUNDUS VINI 20th Grand International Wine Awards» մրցանակաբաշխության շրջանակներում կազմակերպվել է գալա ընթրիք:

Հայկական գինիների համտեսի ներքո «Գոլդեն Գրեյպ Արմաս» գործարանի գլխավոր տնօրեն Վիկտորիա Ասլանյանը ներկայացրել է Հայկական գինիների շնորհանդես, որն արժանացել է «Լավագույն շնորհանդես» մրցանակի:

Միջոցառման նպատակն էր նպաստել ինչպես ԵՄ, այնպես էլ աշխարհի տարբեր երկրների շուկաներում հայկական գինեգործական ոլորտի ճանաչելիության բարձրացմանը, արտահանման ծավալների աճի խթանմանը և նոր գործընկերների բացահայտմանը: