Գիշերային հրավառությունների հեղինակները կտուգանվեն

ԵՐԵՎԱՆ, 7 նոյեմբերի. /Նովոստի-Արմենիա/. Հայաստանի ոստիկանությունը երկուշաբթի հայտարարություն է տարածել, որում նախազգուշացրել է գիշերային հրավառությունների համար վարչական պատասխանատվության և խոշոր տուգանքների մասին։

«Հասարակական կարգի և անվտանգության նկատառումներով «Վարչական իրավախախտումների վերաբերյալ» ՀՀ օրենսգրքի 180-րդ հոդվածի 2-րդ մասի համաձայն՝ գիշերային ժամերին՝ 23-ից մինչև 7-ն ընկած ժամանակահատվածում, հրագործական սարքեր օգտագործելն առաջացնում է վարչական տուգանք՝ 100000 դրամի չափով, նշված արարքի կրկնությունը տույժի նշանակման օրվանից հետո մեկ տարվա ընթացքում՝ ենթակա է նվազագույն աշխատավարձի երկու հարյուրապատիկի չափով տուգանքի»,– ասվում է հայտարարությունում։

ՀՀ կառավարության 2012 թ. օգոստոսի 9-ի համապատասխան որոշմամբ՝ «լռության ժամի» համար բացառություն է սահմանված միայն Ամանորի կապակցությամբ՝ թույլատրվում է հրավառություն կազմակերպել դեկտեմբերի 31-ի ժամը 23-ից մինչև հունվարի 1-ի ժամը 1-ը:

«Ոստիկանությունը նման օրինախախտումներին արձագանքելու է ամենայն խստությամբ»,– նշվում է հաղորդման մեջ։ -0-