Գազի սակագինը Հայաստանի սպառողների համար նվազել է

ԵՐԵՎԱՆ, 31 մայիսի. /Նովոստի-Արմենիա/. Հայաստանի հանրային ծառայությունները կարգավորող հանձնաժողովը նվազեցրել է սպառողների գազի սակագինը։

Ինչպես նշեց ՀԾԿՀ սակագնային քաղաքականության վարչության պետ Գարեգին Բաղրամյանը, «Գազպրոմ Արմենիա» ընկերությունն ապրիլի 29–ին ներքին սպառողի համար գազի գործող սակագնի վերանայման հայտ է ներկայացրել` առաջարկելով այն նվազեցնել 6 տոկոսով, հայտնում է «ԱՌԿԱ» գործակալությունը։

Հանձնաժողովի որոշմամբ, ամսական մինչև 10 հազար խմ գազ օգտագործող բաժանորդների համար սակագինը դարձել է 146.7 դրամ ներկայիս 156 դրամի փոխարեն մեկ խմ գազի դիմաց (ներառյալ ԱԱՀ)։


Միաժամանակ ամսական ավելի քան 10 հազար խմ գազ օգտագործող բաժանորդների համար սակագինը նվազեցվել է մինչև 257.56 դոլար յուրաքանչյուր հազար խմ–ի դիմաց` ներկայիս 276.98 դոլարի փոխարեն։

«Որոշումն ընդունվել է ապրիլի սկզբին ստորագրած միջկառավարական համաձայնագրի հիման վրա, որի համաձայն, Ռուսաստանը նվազեցրել է Հայաստանին մատակարարվող բնական գազի գինը սահմանում 165 դոլարից մինչև 150 դոլար հազար խորանարդ մետրի դիմաց»,– ասաց Բաղրամյանը։

Ըստ նրա, իջոցված նոր սակագներն ուժի մեջ կմտնեն 2016 թվականի հուլիսի 1–ից։

Նա միաժամանակ նշեց, որ ընկերության եկամուտները կպահպանվեն 7 մլրդ դրամի չափով, որոնք կուղղվեն գազամատակարարման համակարգի վերազինմանը, հիմնանորոգմանը և համակարգի պահպանմանը։

«Գազպրոմ Արմենիայի» կապիտալ ներդրումները 2013-2015 թվականներին կազմել են 14.3 մլրդ դրամ։

«Գազպրոմ Արմենիա» ՓԲԸ-ն (նախկինում` «ՀայՌուսգազարդ» ՓԲԸ) ստեղծվել է 1997 թվականին։ Գործունեության հիմնական ոլորտը Հայաստանի ներքին շուկայում ռուսական բնական գազի մատակարարումը և բաշխումն է։ Բացի այդ, ընկերությունը զբաղվում է բնական գազի տեղափոխմամբ, պահմամբ, բաշխմամբ և իրացմամբ, Հայաստանի Հանրապետության գազատրանսպորտային համակարգի և ստորգետնյա պահոցների վերակառուցմամբ և ընդլայնմամբ։ -0-