Երթի մասնակիցները ՌԴ դեսպանության մոտ «ռուսական արյունոտ երկարաճիթ կոշիկ» էին ցանկանում թողնել

ԵՐԵՎԱՆ, 21 ապրիլի. /Նովոստի–Արմենիա/. Երևանում անցկացվող «Ձեռքերդ հեռու Արցախից» երթի մասնակիցները մոտեցել են Հայաստանում Ռուսաստանի դեսպանության շենքին, հայտնում է «Նովոստի–Արմենիա» գործակալության թղթակիցը։

Ոստիկանությունը շղթայել է շենքի մուտքը և հետ մղել մասնակիցներին հակառակ մայթ։

Ակտիվիստները ցանկանում են դեսպանատան մոտ խորհրդանշական «նվեր» թողնել` հին կոշիկներով ստվարաթղթե տուփ։ Ինչպես պարզաբանեցին ակցիայի մասնակիցները, դա խորհրդանշում է «ռուսական արյունոտ կոշիկը»։ Ցուցարարները պատրաստվել էին նաև «Մոլոտովի կոկտեյլի» խորհրդանշական շիշ թողնել դեսպանատան մոտ։

Ոստիկանությունը թույլ չի տվել կատարել այդ ակցիան։

Երթի մասնակիցները պահանջում են «միջազգային իրավունքին համապատասխան` ճանաչել Արցախի անկախությունը, դադարեցնել Ադրբեջանի զինումը ռուսական նորագույն զինատեսակներով, ինչպես նաև զանգվածային ոչնչացման զենքով, որն օգտագործվելու է Հայաստանի և Արցախի դեմ»։

Երթի կազմակերպիչների խոսքով, Հայաստանը և Արցախը չեն պատրաստվում Ադրբեջանին թեկուզ մի թիզ հող զիջել, հակառակը` առկա է հակառակորդին սանձահարելու կենսական նշանակություն ունեցող նպատակ։ Միաժամանակ, Արցախում խաղաղության և անվտանգության միակ պաշտպանը մնում է արցախցի զինվորը։ -0-