Երևանը դիտարկում է թուրքական ապրանքների ներկրման արգելքի հնարավորությունը. ԷՆ

ԵՐԵՎԱՆ, 27 ապրիլի. /Նովոստի–Արմենիա/. Հայաստանը դիտարկում է թուրքական ապրանքների ներկրման արգելքի հնարավորությունը, կառավարությունում հարցուպատասխանի ժամանակ ասաց Էկոնոմիկայի նախարար Արծվիկ Մինասյանը։

Պատգամավորներից մեկը կառավարությանն առաջարկեց արգելք սահմանել թուրքական ապրանքների ներկրման, Թուրքիա հանգստի մեկնելու և ուղիղ չվերթեր իրականացնելու վրա` հաշվի առնելով երկրների միջև դիվանագիտական հարաբերությունների բացակայությունը, ինչպես նաև Անկարայի` Ադրբեջանի ռազմատենչ դիրքորոշմանը սատարելը ղարաբաղյան հարցում։

Նախարարը նշեց, որ վարչապետի հանձնարարականով էկոնոմիկայի նախարարությունը համապատասխան ուսումնասիրություններ է անցկացնում այս հարցով, նախևառաջ, այն ապրանքների շուրջ, որոնք սպառնում են հայկական տնտեսությանն ինչպես որակի, այնպես էլ մրցակցության տեսանկյունից։

Ինչպես նշեց նախարարը, հարցը բխում է երկկողմ քաղաքական հարավերություններից, որոնց հիման վրա վերջնական որոշում կընդունվի։

«Հայաստանը, ինչպես և Թուրքիան, ՀԱԿ–ի անդամներ են, սակայն մեր անդամության պահին Անկարան հղում է արել Մարաքեշի փաստաթղթին, որի համաձայն, ըստ էության չի ճանաչում Հայաստանը որպես ՀԱԿ անդամ, ինչը թույլ է տալիս մեզ լիարժեք կիրառել բոլոր գործիքները, որոնք կպաշտպանեն մեր տնտեսությունը»,– ասաց Մինասյանը, հաղորդում է «ԱՌԿԱ» գործակալությունը։

Բացի այդ, նախարարի խոսքով, ԵՏՄ շրջանակում կա գործիքակազմ, որով Հայաստանը կարող է ԵՏՄ շուկայի պաշտպանության և անվտանգության համար պատժամիջոցներ կիրառել մի շարք անուն ապրանքների նկատմամբ։

«Սակայն անհրաժեշտ է հստակ հաշվարկել այդ բոլոր հարցերը, որ սոցիալական վնաս չլինի։ Շուտով մենք կներկայացնենք գործողությունների հստակ ծրագիր, որը կներկայացնի խորհրդարանի դիտարկմանը»,– ասաց Մինասյանը։ -0-