Եղանակը շարունակում է ռեկորդներ սահմանել Հայաստանում

ԵՐԵՎԱՆ, 17 փետրվարի. /Նովոստի-Արմենիա/. Երևանում կրկին կարող է բազմամյա վաղեմության ջերմաստիճանային ռեկորդ սահմանվել:

Ինչպես հայտնում է Հայհիդրոմետկենտրոնը, շաբաթ` փետրվարի 17-ին, մայրաքաղաքում սնդիկի սյունը ցերեկային ժամերին կհասնի 14-16 աստիճան տաքության: Հաղորդման մեջ նշվում է, որ օդի առավելագույն ջերմաստիճանը փետրվարի 17-ին Երևանում արձանագրվել է 1979 թվականին, երբ սնդիկի սյունը ֆիքսել է 13,9 աստիճան տաքություն:

Հաղորդվում է նաև, որ փետրվարի 17-ին, 20-ին և 21-ին սպասվում է առանց տեղումների եղանակ: Փետրվարի 18-ի գիշերը և 19-ին մարզերի մեծամասնությունում, 19-ի ցերեկը` Վայոց Ձորում, Սյունիքում և Արցախում ժամանակ առ ժամանակ սպասվում են տեղումներ, լեռնային շրջաններում` թաց ձյան տեսքով, նախալեռներում և դաշտավայրերում` անձրևի տեսքով: Քամին կլինի հարավ-արևմտյան մինչև 3-8 մետր վայրկյան արագությամբ:

Փետրվարի 18-ի գիշերն օդի ջերմաստիճանը կբարձրանա 4-5 աստիճանով, ցերեկը կնվազի նույնքանով: 18-ին, գիշերը և 19-ի առավոտյան ժամանակ առ ժամանակ սպասվում է անձրև: Կիրակի ցերեկն օդը Երևանում կտաքանա մինչև 9-11 աստիճան տաքություն, գիշերը սպասվում է մինչև հինգ աստիճան տաքություն: -0-