ԵՐԵՎԱՆ, 25 նոյեմբերի. /Նովոստի-Արմենիա/. Միջազգային Դուքենդոյի եւ Ֆուլ կոնտակտ կարատեի ֆեդերացիայի նախագահ, դերասան Գոռ Վարդանյանը մեղադրվում է ապօրինի ռազմամթերք պահելու մեջ, գրում է
«Առավոտ» թերթը:
Սակայն Վարդանյանը պնդում է, որ մեղավոր չէ:
«Տեռորիստի անուն կցվեց իմ վրա, բայց դա իրականությանը չի համապատասխանում»,- ասել է նա նախօրեին Կենտրոն և Նորք Մարաշ վարչական շրջանների ընդհանուր իրավասության դատարանում ցուցմունք տալիս:
Նախօրեին նա դատարանում ցուցմունք է տվել, պատմել է, թե ինչ հանգամանքներում է ռազմամթերքն իր մոտ հայտնվել: Ըստ նրա, ինքը 1999 թվականից ֆիլմեր է նկարում, իսկ 1992 թվականից աշխատել է ներքին գործերի նախարարությունում և ազգային անվտանգության ծառայությունում:
«2005-ին պատերազմի մասին ֆիլմ էի նկարում, գրություն գրեցի այն ժամանակվա ՊՆ նախարար Սերժ Սարգսյանին, հատուկ հրաման դուրս եկավ, գնացի Ղարաբաղ, այնտեղ Սեյրան Օհանյանի գլխավորությամբ նիստ եղավ, քննարկվեց ու մեր ֆիլմի համար ռազմամթերք հատկացվեց բավականին մեծ քանակությամբ»,- ասել է Վարդանյանը:
Նրա խոսքով, ինքը չէր հասկանում ռազմամթերքից և չգիտեր` որն է պայթուցիկ, որը՝ ոչ: Մեղադրողն էլ Գոռ Վարդանյանից հետաքրքրվել է. «Ինչո՞ւ չեք հանձնել զինամթերքը, երբ ավարտել եք ֆիլմի նկարահանումը», ինչին Գոռ Վարդանյանը պատասխանել է, թե հանձնել է:
Դատական նիստի ավարտին Գոռ Վարդանյանի փաստաբանը միջնորդել է որպես վկա հրավիրել պիրատեխնիկ Տիգրան Շահինյանին, ավելացնելով, թե վկան գիտի, թե ինչ զենք է օգտագործվել ու ինչ միջոցներով:
Դատական հաջորդ նիստը կկայանա դեկտեմբերի 4-ին: -0-
