COVID-19-ը երիտասարդացել է․ «Սուրբ Գրիգոր Լուսավորիչ» ԲԿ-ում գտնվում են 22 և 28 տարեկան պացիենտներ, որոնք միացված են արհեստական օդափոխման սարքին

ԵՐԵՎԱՆ, 20 օգոստոսի․/Նովոստի-Արմենիա/․ ՀՀ առողջապահության նախարար Անահիտ Ավանեսյանը խստորեն զգուշացնում է, որ COVID-19-ը երիտասարդացել է. hիվանդությունը ձեռք է բերել զարգացման ավելի արագ տեմպ: 

Նա նշելէ, որ այս պահին Սուրբ Գրիգոր Լուսավորիչ հիվանդանոցի վերակենդանացման բաժանմունքում է գտնվում COVID-19 դրական ախտորոշմամբ 2 պացիենտ` 22 և 28 տարեկան: 

Նրանք միացված են թոքերի արհեստական օդափոխության սարքին: Պացիենտների վիճակը գնահատվում է ծայրահեղ ծանր:

«Վիճակագրությունը ցույց է տալիս, որ ամբողջ աշխարհում COVID-19-ի հետևանքով 50-ից ցածր տարիքի անձանց, այդ թվում` երեխաների շրջանում, հիվանդության ծանր ընթացքի և հոսպիտալացման ցուցանիշը կտրուկ աճել է», - նշել է նախարարը Facebook-յան իր էջում: 

 Օգոստոսի 20-ի, ժամը 11:00-ի դրությամբ հաստատվել է կորոնավիրուսային հիվանդության ընդհանուր 236 742 դեպք, որոնցից 223 736-ն` առողջացած, 4732-ը` մահվան ելքով։-0-