Բուքմեյքերական գրասենյակում սպանություն կատարողի նկատմամբ հետախուզում է հայտարարվել

ԵՐԵՎԱՆ, 25 դեկտեմբերի. /Նովոստի–Արմենիա/. Նախօրեին Երևանի բուքմեյքերական գրասենյակներից մեկում 28–ամյա Արթուր Նազարյանի սպանության կատարողը նախկինում դատված 32–ամյա Կարեն Շահինյանն է, հայտնում է ՀՀ ոստիկանության պաշտոնական կայքը։

Սպանողի ինքնությունը պարզվել է Հայաստանի ոստիկանության Երևան քաղաքի վարչությունների և Շենգավիթի բաժնի ծառայողների ձեռնարկած օպերատիվ-հետախուզական լայնածավալ միջոցառումների շնորհիվ։

Հաղորդման մեջ նշվում է, որ Շահինյանն ավազակությամբ գույք հափշտակելու նպատակով հարձակում կատարելու դիտավորությամբ՝ դեկտեմբերի 24-ին, ժամը 01.00-ից 02.00-ն ընկած ժամանակահատվածում, սուր կտրող-ծակող գործիքով հարվածել է Արթուր Նազարյանի որովայնին, պարանոցին և կրծքավանդակին, սպանել նրան ու հափշտակել գումար:

Դեկտեմբերի 24-ին Կարեն Շահինյանի նկատմամբ հայտարարվել է հետախուզում ՀՀ քրեական օրենսգրքի 104 հոդվածի 2-րդ մասի 8-րդ կետի և 175 հոդվածի 2-րդ մասի 4-րդ կետի մեղադրանքով:

Քննությունը շարունակվում է: -0-