Արցախում վիրավորված զինվորի վիճակը թույլ չի տալիս տեղափոխել նրան արտերկիր. ԱՆ

ԵՐԵՎԱՆ, 19 մայիսի. /Նովոստի–Արմենիա/. Արցախում վիրավորված զինվոր Արման Լազգիյանի ներկայիս վիճակը թույլ չի տալիս դիտարկել նրան արտերկիր տեղափոխելու հարցը, հինգշաբթի լրագրողներին ասաց Հայաստանի առողջապահության նախարար Արմեն Մուրադյանը։

Նա ընդգծեց, որ դա առայժմ անհնար է, հաշվի առնելով, որ Լազգիյանը երկու օր առաջ վիրահատվել է։

«Երեկ երեկոյան ես հանդիպել եմ զինծառայողի ծնողների հետ, մենք քննարկել ենք այդ հարցը։ Չեմ կարծում, թե նրա տեղափոխումն արտերկիր հնարավոր է, հաշվի առնելով, որ զինվորի մոտ առաջացած բարդությունների նոր վիրահատության հանգեցրին։ Կրկնում եմ, որ այս խնդիրը պետք է լուծվի միայն կոնսիլիումի արդյունքներով, ոչ թե էմոցիաների հիման վրա»,– նշեց Մուրադյանը։

«Ես կիսում եմ ծնողների հուզմունքը։ Նախօրեին մենք երկար խոսել ենք այն մասին, որ նրանք ցանկանում են նրան այլ հիվանդանոց տեղափոխել, կարծում եմ` դա նրանց իրավունքն է»,– ավելացրեց նա։

Մարտական դիրքերում վիրավորում ստացած զինծառայող Արման Լազգիյանը մայիսի 17–ին վիրահատվել է «Էրեբունի» ԲԿ–ում։
Հաղորդման համաձայն, անցկացրած կոմպյուտերային տոմոգրաֆիայի արդյունքները ցույց են տվել, որ 19–ամյա վիրավորի թոքային խոռոչում հեղուկ է հավաքվում։

Նույն օրը երեկոյան ժամը 23:00-ի սահմաններում հիվանդի մոտ սկսել է ստամոքսաղիքային սուր արյունահոսություն: Կատարվել է գաստրոսկոպիկ հետազոտություն և 12-մատնյա աղիքում հայտնաբերվել է «սթրեսային խոց»: Զինծառայողն անհապաղ վիրահատվել է, կարվել է խոցը, ինչպես նաև կատարվել է պլաստիկ միջամտություն: -0-