Ապրիլին մենք 70.000 աշխատատեղ կորցրեցինք․ Նիկոլ Փաշինյան (ՎԻԴԵՈ)
ԵՐԵՎԱՆ, 12 օգոստոսի․ /Նովոստի-Արմենիա/․ Վարչապետ Նիկոլ Փաշինյանը հանդիպում է ունեցել նախագահ Արմեն Սարգսյանի հետ, որի ընթացքում զրուցակիցները քննարկել են երկրի ընթացիկ օրակարգին, առկա խնդիրներին և զարգացման ծրագրերին վերաբերող հարցեր:
Վարչապետի խոսքով՝ իշխանություններն արձանագրել են երկու բան, որ սահմանափակումները չեն բերում ցանկալի արդյունքի և երկրորդը՝ ապրիլին երկիրը 70.000 աշխատատեղ է կորցրել:
«Կառավարությունը հիմնական խնդիրը ձևակերպեց հետևյալ կերպ. առողջապահական կարողությունները պետք է զարգանան այնքան, որ ոչ մի քաղաքացի չմնա առանց պատշաճ բուժօգնության: Կարող եմ արձանագրել, որ այդ խնդիրը լուծեցինք և ծավալվեցին շատ լուրջ հզորություններ, պետական բյուջեից մեծ ծախսեր արեցինք, որպեսզի տեխնիկա ձեռք բերենք, ծավալենք և այլն»,- նշել է Փաշինյանը:
Նշելով, որ այսօր կորոնավիրուսի հետևանքով զոհերի թիվը մեծ է, վարչապետը, մատնանաշելով կորի շարունակական շատ լուրջ անկման արձանագրումը, ասել է, որ ամենօրյա մահերի թիվը դեռևս չի նվազում, չի զրոյանում և սա նախորդից եկած պրոցեսի հետևանք է: Նրա խոսքով, հիվանդանոցների կոնսերվացման հետ միաժամանակ , ասվում է, որ ոչ մի երաշխիք չկա, որ կրկին այդ թվերը չեն բարձրանա:
«Բայց այսօր շանս ունենք ի վերջո աշնանը գլոբալ առումով ամենալավ վիճակն ունենալ, որովհետև հիմա տեսնում ենք, որ աշխարհում կան երկրներ, որոնք պաշտոնապես հայտարարել էին, թե հաղթահարել են կորոնավիրուսը, բայց ստիպված են վերադառնալ ամենախիստ սահմանափակումների տրամաբանությանը»,- հայտնել է վարչապետը:
Ընդգծելով տնտեսության մեջ խնդիրների առկայությունը՝ Փաշինյանը նշել է, որ հիմա փորձում են ոլորտային լուծումներ գտնել:
«Հիմնական խնդիրը հետևյալն է՝ պահպանել և ավելացնել աշխատատեղերը: Իհարկե, սա նախնական նպատակն է, բայց սա նշանակում է խթանել արտահանումը, խթանել արտադրությունը, խթանել սպառումը»,- ասել է նա:-0-
