ԵՐԵՎԱՆ, 8 մայիսի./Նովոստի-Արմենիա/. ՀՀ ԱՆ մամուլի քարտուղար Ալինա Նիկողոսյանը պատասխանել է սոցցանցերում Արսեն Թորոսյանին ուղղված քննադատություններին այն բանից հետո, որ վերջինս սրժարան է այցելել:
Հիշեցնենք, որ նախօրեին մի քանի Facebook-յան օգտատերեր լուսանկարներ էին հրապարակել բացօթյա սրճարանից, որոնցում երևում է սրճարանում նստած Արսեն Թորոսյանը:
«Անդրադառնալով որոշ օգտատերերի այն «մեղադրանքներին», թե նախարար Արսեն Թորոսյանը սրճարան է այցելում՝ հիշեցնեմ, որ մայիսի 4-ից դրանց բացօթյա գործունեությունը թույլատրված է և հասանելի է բոլորին։ Ինչպես երևում է նկարում՝ առողջապահության նախարար Արսեն Թորոսյանը և իր տեղակալները բացօթյա սրճարանում քննարկում են անցկացնում։ Ուրախ եմ, որ հետևում եք նախարարի բոլոր քայլերին, լավ կլիներ նույն ոգեշնչմամբ հետևեիք նաև 3 ամիս շարունակ՝ 24/7 ռեժիմով կատարված աշխատանքներին»,- նշել է Ալինա Նիկողոսյանն իր Facebook-յան էջում:
Նա նաև նշել է, որ սրճարանը նախարարությունից մի քանի մետր հեռավորության վրա է: -0-