Վանեցյանը խոստացել է նոր կոռուպցիոն բացահայտումներ

ԵՐԵՎԱՆ, 15 հունիսի./Նովոստի–Արմենիա/. ԱԱԾ տնօրեն Արթուր Վանեցյանը «Շանթ» հեռուստաալիքին տված հարցազրույցում խոստացել է նոր կոռուպցիոն բացահայտումներ։

«Կոռուպցիոն բացահայտումներ սպասվում են միշտ, ինչն  անխուսափելի է: Քանի դեռ կան մարդիկ, մարդկանց խմբեր, որոնք խախտում են օրենքը, ԱԱԾ-ն բացահայտելու է նման դեպքեր՝ անկախ իշխանության թևի ներկայացուցիչներ են, ընդդիմության, թե ապաքաղաքական մարդիկ են», – ասել է նա։

Պատասխանելով այն հարցին, թե տեղին են այն մեկնաբանությունները, որ ԱԱԾ-ի առջև խնդիր է դրված ամիսը մեկ աղմկահարույց կոռուպցիոն դեպք բացահայտել` Վանեցյանը հավաստիացրել է, որ քաղաքական ղեկավարության կողմից, ի դեմս վարչապետի՝ ԱԱԾ-ի առջև նման խնդիր չի դրվել, չի դրվում և «կարծում եմ չի էլ դրվի»։

«Մենք գործում ենք սովորական ռեժիմով, տեղեկատվությունն ստանում ենք, ստուգում ենք, եթե հաստատվում է, գնում ենք իրացման և բացահայտում ենք, եթե տեղեկատվություն չստացվի, չեմ կարող ամիսը մեկ ժամանակացույց դնել ու ասել՝ գտեք, դա կանխատեսել հնարավոր չէ», – նշել է ԱԱԾ տնօրենը։–0–