ԵՐԵՎԱՆ, 30 օգոստոսի./Նովոստի–Արմենիա/. Շիրակի մարզի Նոր Արթիկ գյուղի 23-ամյա հովիվի կյանքը թունավոր օձից
փրկած նրա 2 գամփռները սատկել են օձի խայթոցից:
Նոր Արթիկի գյուղապետ Վարդգես Ներսիսյանը պատմեց, որ դեպքը տեղի է ունեցել օգոստոսի 27-ի կեսօրին, հաղորդում է
news.am–ը:
«Հովիվը կովերին է տարել դաշտ, շները հոտառությամբ զգացել են օձի մոտենալը, գնացել են օձի ուղղությամբ, հովիվն էլ նրանց հետևից է գնացել: Շները հարձակվել են օձի վրա, կռվել են, օձը խայթել է նրանց, շներից մեկը 5 րոպե հետո է սատկել, մեկն էլ գյուղ վերադառնալուց հետո: Օձին վնասել էին, օձն էլ է սատկել: Կարևորը հովիվին չի խայթել օձը, գյուղից 6 կմ հեռավորության վրա է դեպքը տեղի ունեցել, որ խայթեր էլ չէր կարող հասնել գյուղ»,- պատմել է գյուղապետը:
Նա նշել է, որ հովիվը ապրիլյան պատերազմի մասնակից է եղել, ծառայությունից հետո գյուղի գործերով` անասնապահությամբ է զբաղվում:–0–
