ԵՐԵՎԱՆ, 15 դեկտեմբերի./Նովոստի–Արմենիա/. ԱԱԾ նախկին տնօրեն, «Հայրենիք» ընդդիմադիր կուսակցության առաջնորդ Արթուր Վանեցյանը որոշ մանրամասներ է ներկայացրել Ադրբեջանի հետ իր կոնտակտների մասին, երբ զբաղեցնում էր ԱԱԾ տնօրենի պաշտոնը։
Վերջին օրերին սոցցանցերում և ԶԼՄ–ներում շրջանառվում է Վատիկանում ՀՀ նախկին դեսպան, ՀՀ նախկին նախագահ Սերժ Սարգսյանի փեսա Միքայել Մինասյանի հայտարարությունն այն մասին, որ 2018թ.–ի հոկտեմբերին Դուբայում Վանեցյանն Ադրբեջանի ԱԱԾ տնօրենից ստացել է ծրար, որը հետո փոխանցել է ՀՀ վարչապետ Նիկոլ Փաշինյանին։ Մինասյանի խոսքով, ծրարում առաջարկվում էր Ադրբեջանին հանձնել Արցախի 7 շրջանները 5 մլրդ դոլարի դիմաց։
«Հրապարակը» դիմել է Վանեցյանին` պարզաբանումներ ստանալու համար։
Загружается новость ... "Лево"
«Ընդամենը հուշեմ, Ձեր հարցի, ինչպես նաև ստեղծված աղետալի իրավիճակի հետ կապված մի շարք այլ հարցերի պատասխանները կարող եք գտնել՝ ևս մեկ անգամ ուշադիր վերընթերցելով իմ հրաժարականի դիմումը: Այս պահին մեկ բան ակնհայտ է, վարչապետ Նիկոլ Փաշինյանը դավաճան է և պետք է անհապաղ հեռանա: Դա բխում է Հայաստանի Հանրապետության և մեր ժողովրդի շահերից, սա ասում եմ ոչ թե որպես միայն ՀՀ քաղաքացի, այլ որպես ԱԱԾ նախկին ղեկավար», – հայտարարել է Վանեցյանը։
Վանեցյանը հրաժարական է տվել 2019թ.–ի սեպտեմբերին։ Իր հայտարարության մեջ նա նշել է. «Պետականաշինությունն իր տրամաբանությունն ունի` որոշումների տարերայնությունը, գործողությունների հախուռնությունը, առաջնայինը երկրորդականից, իսկ անցողիկը մնայունից չտարբերելու գործելաոճն այն ճանապարհը չէ, որը տանում է դեպի նպատակների իրականացում։ Նման որոշումն ստեղծված իրավիճակում և գալիքի համատեքստում համարում եմ Հայաստանի Հանրապետությանը և իմ ժողովրդին ծառայելու ամենանախընտրելի և ամենահիմնավորված տարբերակը»։
«Թե ես, թե Նիկոլ Փաշինյանը բազմիցս նշել ենք, որ 2018թ. հեղափոխությունից հետո Հայաստանի և Ադրբեջանի ղեկավարների միջև հաստատվել է օպերատիվ կապ, և այո՝ մինչև ԱԱԾ տնօրենի պաշտոնում իմ պաշտոնավարման ավարտը այդ կապն իրականացվել է իմ և ևս մեկ պաշտոնյայի միջոցով, ով մինչ օրս պաշտոնավարում է: Օպերատիվ կապի շրջանակներում ես պարբերաբար հանդիպումներ եմ ունեցել Ադրբեջանի ներկայացուցչի հետ, այդ թվում՝ Դուբայ քաղաքում։ Այդ շփումների արդյունքում բազմիցս տարաբնույթ տեղեկություններ եմ ստացել և փոխանցել Նիկոլ Փաշինյանին, իսկ այդ շփումների մասին տեղյակ են եղել Ազգային անվտանգության խորհրդի բոլոր անդամները:
Ինչ վերաբերում է հիշատակված հանդիպման կամ այդ ձևաչափով տեղի ունեցած բազմաթիվ այլ հանդիպումների բովանդակությանը, ապա հարկ եմ համարում ևս մեկ անգամ ընդգծել, որ չեմ պատրաստվում ծառայության բերումով ստացված տեղեկությունները հրապարակայնացնել», – նշել է Վանեցյանը «Հրապարակ» օրաթերթին։–0–
