ԵՐԵՎԱՆ, 21 հուլիսի․/Նովոստի-Արմենիա/․ ՀՀ նախկին նախագահ, «Հայաստան» դաշինքի առաջնորդ Ռոբերտ Քոչարյանը բացատրել է, թե ինչու է Ադրբեջանը դիմում սրացման։
«Ադրբեջանի նպատակն ի սկզբանե եղել է Ղարաբաղի ամբողջությամբ զավթումը, ռուսական կողմի միջամտությամբ այդ ծրագիրը կիսատ մնաց։ Հիմա այո, փորձելու են տարբեր ճնշումներով հասնեն իրենց նպատակին։ Մեր ժողովրդի մի զանգված սարսափած է նոր պատերազմի վտանգով, և կարծում եմ այս հանգամանքը էական նշանակություն ունեցավ նաև ընտրությունների արդյունքների վրա, ոնց որ մենք ընդունել ենք մեր պարտությունը և չենք ակնկալում և չենք ուզում որևէ քայլ անի այս իշխանությունը, հանկարծ նոր կոնֆլիկտ չհրահրվի։ Այսօր պարտվողական հոգեբանություն է տիրում մեր ժողովրդի մի մասի մոտ», - ասել է Քոչարյանը։
Նրա խոսքով, վերջին ամիսներին Հայաստանի նկատմամբ միջազգային մակարդակում արվում են ստորացուցիչ հայտարարություններ, ինչին երկիրը չի պատասխանում։
«Մենք սովորեցրել ենք մեր թշնամուն նրան, որ մեզ հետ կարելի է վերաբհերվել նման կերպ։ Իմ տպավորություններով, այդ ամենն օգտագործվել է Հայաստանի կողմից ներքաղաքական նպատակների համար», - ասել է Քոչարյանն՝ ավելացնելով, որ իշխանությունները մանիպուլյացիայի են ենթարկում բնակչության վախը նոր պատերազմի առաջ, օգտագործելով այն իրենց նպատակների համար։
Նա նշել է, որ անհասկանալի գործընթացներ են տեղի ունենում բանակում; Մինչև հիմա հաշված չեն Արցախի պատերազմի հետևանքով կրած մարդկային և նյութական կորուստները։ Չեն երևում քայլերը, որոնք ուղղվում են բանակի մարտունակության բարձրացմանը։
Նշենք, որ արդեն մի քանի օր է` լարված իրավիճակ է հայ–ադրբեջանական սահմանի Երասխի հատվածում։ Հուլիսի 19-ի երեկոյան ՊՆ–ն հայտնեց, որ ադրբեջանական զինված ուժերը, ժամը 18:40-ից սկսած, մի քանի ժամ շարունակ, տարբեր տրամաչափի հրաձգային զինատեսակներից գնդակոծել են հայ-ադրբեջանական սահմանի Երասխի հատվածում տեղակայված հայկական դիրքերը։ Պարբերաբար կիրառվել են նաև ականանետեր: Իրադրությունը, ժամը 23:00-ի դրությամբ, շարունակում է լարված մնալ։ Քիչ առաջ հայտնի դարձավ, որ գիշերը մինչև ժամը 02:00-ն Ադրբեջանը շարունակել է գնդակոծել հայկական դիրքերը.վիրավորվել է Երասխի գյուղապետը։
Երասխ գյուղը գտնվում է Արարատի մարզում։ Հարավից անմիջապես սահմանակից է հայ-ադրբեջանական շփման գծին։ Բնակավայրով է անցնում Երևանը Իրանի սահմանին կապող միջպետական Մ 2 ավտոմոբիլային ճանապարհը, որը Հայաստանի հյուսիսն ու հարավը կապող հանգույց է։ Հայ-ադրբեջանական շփման գծի Երասխի հատվածում բնակավայրը սահմանակից է Ադրբեջանի Հանրապետության ենթակայության ներքո գտնվող Նախիջևանի Ինքնավար Հանրապետության Հեյդարաբադ բնակավայրին։ Երասխ գյուղից դեպի արևմուտք է գտնվում հայ-թուրքական շփման գիծը։–0–