Պատվաստում կամ ՊՇՌ թեստ ամիսը երկու անգամ. Հայաստանի ուսուցիչները և մի շարք ոլորտների աշխատողներ ընտրության առջև կկանգնեն

ԵՐԵՎԱՆ, 12 օգոստոսի./Նովոստի–Արմենիա/. Ուսումնական հաստատություններում, հասարակական սննդի օբյեկտներում, մի շարք այլ կազմակերպություններում և կառույցներում պետք է ներդրվի այն կանոնը, ըստ որի, COVID-19-ի դեմ  պատվաստման չենթարկված անձինք (բացի պատվաստումների հակացուցումներից), պետք է ամիսը երկու անգամ հանձնեն կորոնավիրուսի ՊՇՌ թեստը:

Այս մասին հայտարարեց Առողջապահության նախարար Անահիտ Ավանեսյանը լրագրողների հետ ճեպազրույցում:

Հարցին, թե արդյոք դա անուղղակի պարտադրանք չէ պատվաստումների համար, նախարարը պատասխանեց, որ կորոնավիրուսը լուրջ մարտահրավեր է և պետք է ամեն ինչ անել քաղաքացիներին պաշտպանելու համար:

«Եվ այս գործիքակազմում, ինչպես և շատ այլ երկրներ, մենք կօգտվենք նման սահմանափակումներից, քանի որ տվյալ դեպքում բացի առանձին մարդու առողջությունից, հանրային առողջապահության լուրջ վտանգ կա։ Մենք ամեն ինչ կանենք օրենքի շրջանակներում, որպեսզի քաղաքացիները պատվաստվեն», - ասաց նա։

Ավանեսյանը նշեց, որ պարտադիր պատվաստումների պահանջը չի տարածվելու հակացուցումներ ունեցող մարդկանց վրա:

Նա նաև հայտնեց, որ ուսումնական տարվա մեկնարկի հետ սպասվում է կորոնավիրուսով հիվանդացության աճ:

Օգոստոսի 12-ի, ժամը 11:00-ի դրությամբ հաստատվել է կորոնավիրուսային հիվանդության ընդհանուր 233 400 դեպք, որոնցից 221 919-ն` առողջացած, 4669-ը` մահվան ելքով։–0–