ԵՐԵՎԱՆ, 7 նոյեմբերի./Նովոստի–Արմենիա/. «Զանգեզուրի միջանցքի» թեման փակված է եղել դեռևս 2020 թվականի նոյեմբերի 9-ին, երբ որ հայտարարությունը ստորագրված է եղել։ Այս մասին հայտարարել է ՀՀ վարչապետ Նիկոլ Փաշինյանը Հանրային հեռուստաընկերության տված հարցազրույցում` պատասխանելով այն հարցին, թե կարելի է արդյոք համարել, որ քանի որ ՌԴ ԱԳՆ–ն հանդես է եկել հայտարարությամբ, որում առաջին անգամ արտահայտվել է հստակ դիրքորոշում այսպես կոչված «Զանգեզուրի միջանցքի» մասին, որ այդ թեման փակ է։

ՌԴ փոխվարչապետ Ալեքսեյ Օվերչուկն օրերս ՀՀ վարչապետ Նիկոլ Փաշինյանի հետ հանդիպման ընթացքում անդրադարձել է տարածաշրջանում տրանսպորտային հաղորդակցությունների կարգավիճակի հարցին, որոնց ապաշրջափակումը նախատեսված է Արցախյան 44–օրյա պատերազմի ավարտի մասին հայտարարության համաձայն։ Օվերչուկը ՀՀ փոխվարչապետ Մհերի Գրիգորյանի և Ադրբեջանի փոխվարչապետ Շահին Մուսթաֆաևի հետ միասին տարածաշրջանի հաղորդակցությունների ապաշրջափակման հարցերով զբաղվող եռակողմ աշխատանքային խմբի համանախագահներն են։ Օվերչուկը նշել է, որ աշխատանքների արդյունքում կհանգեն կոնկրետ լուծումների: Դրանք առաջին հերթին հիմնվում են նրա վրա, որ ճանապարհների ինքնավարությունը մնում է այն երկրների իրավասությանը, որոնց տարածքով դրանք անցնում են։

«Շատ բարձր եմ գնահատում ՌԴ դիրքորոշման հրապարակայնացումն այս հարցում, որովհետեւ մեծ հաշվով ՌԴ-ն այս հարցում երբեք էլ այլ դիրքորոշում չի ունեցել: Հրապարակայնացվել է ավելի ճիշտ ոչ թե ՌԴ դիրքորոշումը,այլև այդ թվում Ադրբեջանի դիրքորոշումը, որովհետև հստակ ասվում է, որ եռակողմ աշխատանքային խմբում կողմերը պայմանավորվել են այդ մասին: Եվ ես կուզենայի ձեր ուշադրությունը հարվիրեի նաև նախորդ օրը Թուրքիայից հնչած հայտարարությանը, ճիշտ է նրանք, օգտագործում են միջանցք արտահայտությունը, բայց ասում են, որ այդ «միջանցքը» պետք է լինի Հայաստանի վերահսկողության ներքո: Այսինքն` իրականում անկախ բառամթերքի նախընտրություններից մենք խոսում ենք տարածաշրջանային կոմունիկացիաների բացման մասին և պիտի ասեմ, որ Հայաստանը շահագրգռված է տարածաշրջանի կոմունիկացիաների  բացմամբ, Ադրբեջանն էլ է շահագրգռված, Իրանն էլ, Թուրքիան ու Ռուսաստանն էլ են շահագրգռված, խնդիրն այստեղ բանաձևերի վերաբերյալ ընկալումները մոտեցնելու և նույնականացնելու մասին է», –ասաց Փաշինյանը։–0–