Փաշինյան. կառավարությունը կարևորում է կանանց ներգրավումը ԶՈՒ մարտական ստորաբաժանումներում

ԵՐԵՎԱՆ, 24 օգոստոսի./Նովոստի–Արմենիա/.Նոյեմբերի 9-ից հետո մեր կարևորագույն անելիքներից մեկը կա ու մնում է մեր բանակի Զինված ուժերի բարեփոխումները ու արդիականացումը։

Այս մասին այսօր Ազգային ժողովում կառավարության ծրագրի ներկայացման ժամանակ ասաց վարչապետ Նիկոլ Փաշինյանը։

«Բանակի բարեփոխումների մեր օրակարգը որոշ ուժեր փորձում են ներկայացնել որպես վկայություն ագրեսիվ քաղաքականություն որդեգրելու, պատերազմ սկսելու մեր մտադրության կամ որոշման։ Սա որևէ կապ չունի իրականության հետ, որովհետև Հայաստանը, ինչպես ցանկացած խաղաղասեր պետություն, Զինված ուժերը զարգացնելու և վերափոխելու է ոչ թե ագրեսիայի, այլ ագրեսիայից պաշտպանվելու սեփական ինքնիշխանթյունը պաշտպանելու լեգիտիմ և սահմանադրական նպատակով»,-  հայտարարեց վարչապետը։

Փաշինյանի խոսքով՝ Զինված ուժերի բնագավառաում կառավարության նպատակն է իրականացնել շարունակական բարեփոխումներ, որոնք կապահովեն Զինված ուժերի կողմից սահմանադարկան առաքելության կատարումը։

«Հայաստանի Հանրապետությունը տարածքներ նվաճելու, պատերազմ սկսելու որևէ մտադրություն չունի։ Ռազմավարական առումով ՀՀ-ն աստիճանաբար անցում կկատարի պրոֆեսիոնալ բանակի, էականորեն կփոխվի ժամկետային և զորահավաքային զինծառայության կառուցվածքը»,-նշեց նա։

Փաշինյանի խոսքով՝ կառավարությունը կարևորում է նաև կանանց ներգրավումը ԶՈՒ-երի մարտական ստորաբաժանումներում։

«Կանանց ներգրավածության մասին թեզը չունի որևէ գաղափարախոսական կամ հակագաղափարախոսական հենք, այլ պայմանավորված է բացառապես պրագմատիկ հաշվարկով։ Կանայք Հայաստանի բնկաչության մեծամասնությունն են և նրանց ռեսուրսի թերգրավվածությունը որևէ ոլորտում, պաշտպանությունից մինչև տնտեսություն, նշանակում է մեր երկրի զարգացման պոտենցիալի աղճատում»,- ասաց Նիկոլ Փաշինյանը։։

Փաշինյանը հավելեց նաև, որ ասվածը չի նշանակում, որ կանայք պետք է բանակում նույնքան ներգրավված լինեն, որքան տղամարդիկ, խոսքը պոտենցիալի հնարավորինս լիարժեք օգտագործման մասին է:-0-