Փակ շուկայի դիմացի գետնանցումում վերելակ կտեղադրվի

ԵՐԵՎԱՆ, 17 փետրվարի./Նովոստի-Արմենիա/. Երևանի ավագանու «Իմ քայլը» խմբակցության անդամ Աշոտ Սարգսյանը Facebook-յան իր էջում հայտնել է, որ Երևանի Փակ շուկայի դիմացի գետնանցումում վերելակ կտեղադրվի:

Նախօրեին գետնանցումը հանձնվել է շահագործման, այն հիմնովին վերանորոգվել է, սակայն հասարակությանն անհանգստացնում է գետնանցումում հաշմանդամների համար թեքահարթակների բացակայությունը:

«Անդրադառնալով լրատվականներում տեղ գտած «Փակ շուկայի գետնացումը չունի թեքահարթակ» հոդվածներին, տեղեկացնեմ, որ դեռ 10 օր առաջ գետնանցում այցիցս հետո այդ խնդրի մասին խոսել եմ շին բարեկարգման վարչության պետ Խորեն Գրիգորյանի հետ, նա հավաստիացրեց, որ նախատեսված է թեքահարթակի փոխարեն վերելակի տեղադրում, երբ մրցույթով մասնավորի տրամադրվի: Ի դեպ քաղաքում շատ տեղերում գետնացումները նախկինում «սխալ» են կառուցվել, աստիճանների անհրաժեշտ անկյունը կտրուկ է և լայնանալու տարածք չկա և այդ պատճառով ամենառացիոնալ լուծումը վերելակներն են: Պետք չի անել ուղղակի անելու համար, եթե թեքահարտակից օգտվելը գրեթե անհնարին է լինելու», - գրել է Սարգսյանը:

Երևանի քաղաքապետարանի խոսնակն իր հերթին նշել էր, որ Երևանի քաղաքապետարանը որոշել է գետնանցումի տարածքը աճուրդի միջոցով տալ վարձակալության և դրա հիմնական նախապայմաններից մեկը լինելու է սահմանափակ հնարավորություններ ունեցող քաղաքացիների համար նախատեսված հատուկ կահավորված վերելակային համակարգի տեղադրումը:-0-