Օպերային հարակից փողոցներում բերման են ենթարկում բողոքի ակցիայի մասնակիցներին․ տեղում մեծ թվով ոստիկաններ են

ԵՐԵՎԱՆ, 15 մայիսի․/Նովոստի–Արմենիա/․ Երևանում ոստիկանությունը սկսել է բերման ենթարկել վարչապետ Նիկոլ Փաշինյանի հրաժարականը պահանջող քաղաքացիներին։

«Տավուշը հանուն հայրենիքի» շարժման ակտիվիստները և նրանց աջակցող քաղաքացիները գտնվում են Օպերայի հարակից տարածքում։

Տեղում մեծ թվով ոստիկաններ են, որոնք շղթայով շրջապատել են թատրոնի շենքը։ Նրանց ձեռքում նկատվում են արցունքաբեր գազի գլանակներ։

Այս պահին վարչապետ Նիկոլ Փաշինյանը ելույթ է ունենում Օպերայի և բալետի ազգային ակադեմիական թատրոնում։ Օպերայի հրապարակի հարակից փողոցներում շարունակվում են խաղաղ իրազեկման ակցիաները։

Այսօր ոստիկանությունը հայտնել էր, որ Սպենդիարյանի անվան օպերայի և բալետի ազգային ակադեմիական թատրոնում կայանալիք ՎԶԵԲ միջազգային ֆորումի շրջանակներում կազմակերպված միջոցառման առնչությամբ հասարակական կարգն ու անվտանգությունն ապահովելու նպատակով՝ մայիսի 15-ին, ժամը 15.00-ից 20.00-ն Օպերայի և բալետի ազգային ակադեմիական թատրոնի հարակից փողոցներում սահմանափակվելու են երթևեկությունն ու քաղաքացիների տեղաշարժը։