Օմիկրոնով վարակվածները ՀՀ քաղաքացիներ են. ԱՆ փորձագետը մանրամասներ է հայտնում նրանց վիճակից

ԵՐԵՎԱՆ, 13 հունվարի./Նովոստի–Արմենիա/. Հայաստանում արդեն կա օմիկրոն շտամով վարակված երկու դեպք:

Այս մասին ասաց ՀՀ առողջապահության նախարարության հիվանդությունների վերահսկման և կանխարգելման ազգային կենտրոնի վարակիչ և ոչ վարակիչ հիվանդությունների համաճարակաբանության վարչության պետ Ռոմելլա Աբովյանը:

Նրա խոսքով՝ հաստատված երկու դեպքերը Հայաստանի քաղաքացիներ են, կլինիկական թեթև ընթացքով: Նրանք բուժումը ստանում են տանը:


«Եթե ամբողջ աշխարհում և մեր հարևան երկրներում կա, բնականաբար, Հայաստանը չէր կարող զերծ մնալ: Այս պահին որոշ խմբերի շրջանակներում պարբերաբար իրականացվում են այդ հետազոտությունները, տվյալ դեպքում նմուշները վերցրել են սահմանի անցման կետ մուտք գործած անձանցից: Գործընթացը շարունակական է, մեր հետազոտությունները շարունակվում են տարբեր խմբերի բուժառուների շրջանակում, ովքեր ունեն ախտանշաններ, որպեսզի պարզենք, թե որտեղից է անջատվում օմիկրոնը, այսինքն ունենք շրջանառություն, թե ոչ»,- ասաց մասնագետը:

«Օմիկրոնի ախտանշանները շատ նման են այլ շտամերով վարակված անձանց մոտ առկա ախտանշաններին՝ ջերմության բարձրացում, հազ, քթից արտահոսք, մկանացավ», – ասաց Աբովյանը:

Նա հավելեց նաև, որ ըստ միջազգային հետազոտությունների, օմիկրոնի պարագայում շատ ավելի քիչ է ախտահարվում թոքային հյուսվածքը, և թոքաբորբ ավելի քիչ է առաջանում:–0–