Կաթնամթերքի արտադրամասի գործունեություն է կասեցվել (ՖՈՏՈ)

ԵՐԵՎԱՆ, 29 սեպտեմբերի./Նովոստի-Արմենիա/. ՀՀ սննդամթերքի անվտանգության տեսչական մարմնի Երևանի կենտրոնի տեսուչները «Դեըրի ֆուդս» ՍՊԸ-ին պատկանող կաթնամթերքի (պանիր և պանրային մթերք) արտադրամասում իրականացրած ստուգման ընթացքում պարզել են, որ այն գործում է իրավական ակտերով սահմանված սանիտարահիգիենիկ նորմերի խախտումներով (Արմավիրի մարզ, ք. Արմավիր), հաղորդում է Սննդամթերքի անվտանգության տեսչական մարմինը:

Մասնավորապես՝
- չի ապահովվել արտադրական շինության տարածքի կրծողների և միջատների ներթափանցումից պաշտպանությունը․
- ավազանները, որտեղ հավաքվում են կաթից առանձնացված շիճուկները չեն եղել բարվոք վիճակում,
- հատակը և պատերը չեն եղել անջրանցիկ և լվացվող, չի իրականացվել լվացում, ախտահանում և ցամաքեցում, չի կանխարգելվել կեղտի կուտակումն ու բորբոսի առաջացումը
- արտադրամասն ապահովված չի եղել ձեռքերը լվանալու համար նախատեսված լվացարաններով՝ տաք և սառը ջրով,
- արտադրական շինության բոլոր սարքավորումները պատրաստված չեն եղել հիգիենայի պահանջները բավարարող նյութերից և չեն պահվել նորոգ վիճակում:

«Կաթնամթերքի արտադրամասի արտադրական գործունեությունը կասեցվել է, սահմանվել է ժամկետ հայտնաբերված խախտումները վերացնելու համար», - նշվում է հաղորդագրության մեջ:-0-