Կառավարության ծրագիրն ամբողջացնելուց առաջ անհրաժեշտ է նորից դիտել քարոզարշավի ժամանակ քաղաքացիների հետ հանդիպումների տեսանյութերը.Փաշինյան
ԵՐԵՎԱՆ, 27 օգոստոսի./Նովոստի–Արմենիա/. ՀՀ վարչապետ Նիկոլ Փաշինյանն այսօր կառավարության նիստի սկզբում անդրադարձավ կառավարության 5–ամյա ծրագրին, որը նախօերին հաստատվել էր ԱԺ–ի կողմից։
Նա հույս հայտնեց, որ արդյունքում կունենան մի փաստաթուղթ, որը ամենօրա գործունեության և անելիքներրի պլանը կդառնա։
«Կառավարության միջոցառումների ծրագիրը պիտի բխի կառավարության ծրագրից, իսկ կառավարության որոշումները` միջոցառումների ծրագրից», – նշեց վարչապետը։
Նա հիշեցրեց, որ կառավարության ծրագրի նախաբանում հստակ արձանագրված է, որ ծրագիրը հենված է նաև քարոզարշավի ընթացքում քաղաքացիներին տրված նախընտրական խոստումների վրա։
«Խոսքը տվյալ դեպքում նաև բանավոր խոստումների մասին։ Ըստ այդ, կառավարության գործունեության միջոցառումների ծրագիրը ամբողջացնելուց առաջ անհրաժեշտ է նորից դիտել նախընտրական քարոզարշավի ժամանակ քաղաքացիների հետ նախատեսված և չնախատեսված հանդիպումների տեսանյութերը, և համապատասխան պայմանավորվածությունների հետ կապված անելիքները ներառել միջոցառումների ծրագրի մեջ։ Մի տեղ մարդիկ ճանապարհի հարց են բարձրացրել, մյուս տեղում` դպրոցի կամ մարզագույքի, երրորդ տեղում` երիտասարդական կենտրոնի։ Ամեն ինչը պետք է ներառված լինի միջոցառումների ծրագրում։ 2021թ.–ի հունիսի նախընտրական քարոզարշավի առանցքային և շրջադարձային կետը այն էր, երբ մենք անցնելով 2018թ.–ի, այսինքն` նախորդ նախընտրական քարոզարշավի կանգառի կետերով, տեսանք, որ 2018թ.–ին տված տեղային խոստումները շատ արագ իրագործվել են», – ասաց Փաշինյանն` ընդգծելով, որ կատարված աշխատանքը կարևոր էր նրանով, որ դրանց իրագործումը սկսվել էր 2018թ.–ի դեկտեմբերի ընտրություններից անմիջապես հետո` 2019–2020թթ.–ի, մի ժամանակահատվածում, որ որևէ մեկի մտքով չէր էլ անցնում, որ 2021թ.–ին արտահերթ ընտրություններ են լինելու։
«Այդ աշխատանքներն ակնհայտորեն ձայն հավաքելու տրամաբանության մեջ չէին իրականացվել»,– ասաց Փաշինյանը։
Կառավարության ծրագիրը բաղկացած է 6 բաժնից`անվտանգություն և արտաքին քաղաքականություն, տնտեսություն, ենթակառուցվածքների զարգացում, մարդկային կապիտալի զարգացում, իրավունք և արդարադատություն, Ինստիտուցիոնալ զարգացում։
Ծրագրի քննարկումն ԱԺ–ում անցավ բավականին թեժ մթնոլորտում` ծեծկռտուք, վեճ։–0–
