Իշխանությունները պատրաստ են ամբողջությամբ հանձնել Արցախը թշնամուն. Վանեցյանը պայքարի կոչ է արել (ՎԻԴԵՈ)

ԵՐԵՎԱՆ, 17 ապրիլի./Նովոստի-Արմենիա/. Վերջին օրերին Հայաստանի իշխանությունների արած հայտարարությունները ցույց են տալիս, որ նրանք արդեն համակերպվել են Արցախի կորստի հետ: Այս մասին Facebook-յան ուղիղ եթերում հայտարարել է ԱԺ «Պատիվ ունեմ» խմբակցության նախագահ, «Հայրենիք» կուսակցության ղեկավար Արթուր Վանեցյանը:

«Ես Ազատության հրապարակում եմ, կարծում եմ, որ եկել է կրիտիկական պահը, երբ մենք արդեն ոչնչի չենք կարող հասնել հոդվածներ գրելով, ելույթներով, Facebook-ի հրապարակումներով: Այս իշխանությունների կողմից վերջին օրերին արված հայտարարությունները ցույց են տալիս, որ նրանք արդեն համակերպվել են Արցախի կորստի հետ, պատրաստ են ամբողջությամբ տալ Արցախը թշնամուն, մենք խնդիրներ ունենք Հայաստանի անվտանգության հետ», - ասաց Վանեցյանը:

Նա հայտարարել է, որ եկել է Ազատության հրապարակ, որից չի հեռանա և խոսելու է քաղաքացիների հետ:

«Եկեք համախմբվենք, դառնանք ավելի ուժեղ և պայքարենք Հայաստանի, Արցախի և հայ լինելու համար», - ասել է նա:

Հիշեցնենք, որ ՀՀ վարչապետ Նիկոլ Փաշինյանն ապրիլի 13–ին խորհրդարանում հայտարարեց. «Այսօր միջազգային հանրությունը մեզ կրկին ասում է՝ մի փոքր իջեցրեք Լեռնային Ղարաբաղի կարգավիճակի հարցում ձեր նշաձողը և միջազգային մեծ կոնսոլիդացիա կապահովեք Հայաստանի և Արցախի շուրջ: Հակառակ դեպքում, ասում է միջազգային հանրությունը, խնդրում ենք մեզ վրա հույս չդնել, ոչ թե այն պատճառով, որ մենք չենք ուզում ձեզ օգնել, այլ այն պատճառով, որ մենք չենք կարող ձեզ օգնել»։ Այս հայտարարությունը բուռն արձագանք ստացավ հասարակության շրջանում։ Արցախում գործող մի շարք հասարակական կազմակերպությունների ներկայացուցիչներ վրդովմունք հայտնեցին Արցախի նախագահ Արայիկ Հարությունյանին Փաշինյանի հայտարարության կապակցությամբ։ Արցախի ԱԺ–ն միաձայն ընդունեց հայտարարություն` պահանջելով Հայաստանի իշխանություններից հրաժարվել իրենց ներկայիս աղետալի դիրքորոշումից։-0-