ԵՐԵՎԱՆ, 9 հունիսի./Նովոստի-Արմենիա/. ԱԺ փոխնախագահ, «Հայաստան» խմբակցության պատգամավոր, ՀՅԴ Հայաստանի ԳՄ ներկայացուցիչ Իշխան Սաղաթելյանը «Դիմադրություն» շարժման աջակիցներին կոչ արեց հաջորդ օրը՝ հունիսի 10-ին կրկին հավաքվել Ֆրանսիայի հրապարակում: Հիշեցնելով Հայաստանում անցկացվելիք ՀԱՊԿ ԱԳ նախարարների խորհրդի նիստի մասին՝ Սաղաթելյանն ասել է, որ «իրենք ներկա են գտնվելու և իրենց պահանջները հնչեցնելու»:
«Արմենպրես»-ի փոխանցմամբ՝ Սաղաթելյանն այս մասին ասել է Ֆրանսիայի հրապարակում հրավիրված հանրահավաքին:
Հարթակից նախ ելույթէ ունեցել «Հայաստան» խմբակցության պատգամավոր Արամ Վարդևանյանը: Պատգամավորի կարծիքով՝ «խաղաղ անհնազանդության ակցիաներով ընդդիմությունը Հայաստանում ֆիքսել է քաղաքական ճգնաժամ», ինչն, ըստ նրա, տեսանելի է նաև միջազգային հանրության համար:
Իշխան Սաղաթելյանը ևս պնդել է, որ երկրում քաղաքական ճգնաժամ կա: «Ես նորից պնդում եմ՝ Հայաստանի նորանկախ պատմության մեջ դիմադրության շարժումը բացառիկ է: Արդեն 40 օր, 24 ժամվա ռեժիմով մարդիկ դուրս են եկել փողոց՝ առանց որևէ երկրի աջակցության, առանց ներսի ինչ-որ հատուկ ուժերի աջակցության, առանց ինչ-որ հատուկ առաջնորդի շուրջ համախմբվելու, դուրս են եկել մեկ գաղափարի շուրջ՝ հանուն հայրենիքի»,-ասաց Սաղաթելյանը՝ իրենց պայքարը որակելով որպես զուտ մաքուր ազգային պայքար:
Անդրադառնալով քննադատություններին, որ ընդդիմությունը չունի քաղաքական օրակարգ՝ նա ասել է, որ ապրիլի 5-ից Ազատության հրապարակում հավաքվել և ձևակերպել են իրենց պահանջները՝ այսինքն` քաղաքական օրակարգը, և անցնող 40 օրերի ընթացքում ամեն օր Ֆրանսիայի հրապարակի հարթակից իրենց պահանջները, այդ օրակարգը հնչեցվել են:
«Եղել են ծրագրային հստակ դրույթներ, ծրագրային ելույթներ, որտեղ այդ օրակարգը, պահանջները և դիրքորոշումները հստակ հնչեցվել է», - նշել է Սաղաթելյանը:
Նա հիշեցրել է իրենց ձևակերպած փաստաթղթի՝ հայ-ադրբեջանական եւ հայ-թուրքական հարաբերությունների կապակցությամբ հայտարարության նախագծի մասին, որը տարել էին խորհրդարան, սակայն իշխանական խմբակցությունը նիստին չէր եկել, և այդ օրակարգով նիստը սկսելու համար քվորում չէր ապահովվել: Ըստ նրա՝ այդ պայքարը կանգ չունի, օրակարգը հստակ է, դիրքորոշումը պարզ ձևակերպած:
Այնուհետև Սաղաթելյանն առաջարկե; է երթ իրականացնել՝ Սայաթ-Նովա, Աբովյան, Նալբանդյան փողոցներով, անցնել նաև այն հյուրանոցի մոտով, որտեղ պետք է գիշերի ՌԴ ԱԳ նախարարը: Սաղաթելյանը հաջորդ օրն առավոտյան կրկին մարդկանց հրավիրել է Ֆրանսիայի հրապարակ:
«Տեղի է ունենալու ՀԱՊԿ-ի ընդլայնված կազմով ժողովը: Այնտեղ ենք ներկա լինելու՝ մեր պահանջները հնչեցնելու»,-նշեց Սաղաթելյանը:
Հունիսի
9-ին օրվա ընթացքում Դիմադրության շարժումը քայլերթով գնացել և հավաքվել էր ԱԳՆ շենքի
մոտ, ուր ժամանում էր ՌԴ արտաքին գործերի նախարար Սերգեյ Լավրովը:-0-
