Հայտնի են 2019թ.–ին նորածինների ամենատարածված անունները

ԵՐԵՎԱՆ, 5 փետրվարի./Նովոստի–Արմենիա/. ՀՀ ազգային վիճակագրական կոմիտեն հրապարակել է ամենահայտնի անունները, որոնցով ծնողներն անվանակոչել են իրենց նորածիններին 2019թ.–ին։

Ըստ ավանդույթի, ցանկը գլխավորել են Նարեն և Դավիթը։ 2019թ.–ին 688 նորածին աղջիկ անվանակոչվել է Նարե և 1399 տղա` Դավիթ։ Աղջիկների ամենատարածված անունների հնգյակում ներառվել են Մարիան (585), Արփին (445), Եվան (439) և Անգելինան (438)։

Տղաների անուններին առաջին հնգյակում են հայտնվել Նարեկը (931), Հայկը (576), Մարկը (548) և Տիգրանը (535)։
Նորածինների անունների ցանկում չկա Նիկոլ անունը, միաժամանակ կա 310 երեխա, որոնց անվանակոչել են Մոնթե։ 85 երեխա անվանակոչվել է Էդուարդ , 81 երեխա` Ռուբեն և 78 երեխա` Վաչե։

Ինչ վերաբերում է աղջիկների անունների, ապա արտասահմանյան անուններից ամենատարածվածներն են Անգելինան (438), Էլենը (354), Ադրիանան (279), Արիանան (225), Էմիլին (146) , Մոնիկան (136), Լիան (126) և Լինան (95): Ամենաքիչ տարածում ունեցող անուններն են Լուսինեն (94) և Նարինեն (92): Հետաքրքիր է նաև, որ Եվա անունը հայտնվել է առաջին հնգյակում, իսկ նրա մի փոքր փոփոխված տարբերակը՝ Էվան (234), զբաղեցրել է 19-րդ տեղը:

2019 թ.-ի արդյունքներով՝ հանրապետությունում ծնվել է 17 173 աղջիկ (17 322 աղջիկ` 2018 թ.-ին) և 18 958 տղա (19 252 տղա` 2018 թ.-ին):

Ազգային վիճակագական կոմիտեի տվյալներով, Հայաստանի մշտական բնակչությունը 2019 թ.-ի հոկտեմբերի 1-ի տվյալներով կազմում է 2957.5 հազ. մարդ: Հայաստանի քաղաքային բնակչության թիվը կազմել է 1893.2 հազ. մարդ, ընդ որում՝ Երևանում՝ 1083.6 հազ. բնակիչ: Գյուղական բնակավայրերում բնակչության թիվը կազմել է 1 073,8 հազ. մարդ, ինչը տարեսկզբի ցուցանիշից 6,1 հազարով քիչ է:-0-