ԵՐԵՎԱՆ, 17 մարտի./Նովոստի–Արմենիա/. Հայաստան ռուսական գազի մատակարարումը ժամանակավորապես իրականացվելու է Ադրբեջանի տարածքով Հյուսիսային Կովկաս–Անդրկովկաս գազատարի վերանորոգման պատճառով, հաղորդում է «Կոմերսանտ» թերթը` հղում անելով «Գազպրոմ էքսպորտ»–ի հաղորդագրությանը։
Հրատարակությունից հիշեցրել են, որ մարտի 16–ին ռուսական ընկերությունը կարճաժամկետ պայմանագիր է ստորագրել Ադրբեջանի պետական նավթային ընկերության հետ Ադրբեջանի տարածքով գազի տեղափոխման նպատակով։
«Պայմանագրով նախատեսվում է, որ Հյուսիսային Կովկաս–Անդրկովկաս մայրուղային գազատարի ռուսական հատվածում պլանային վերանորոգման աշխատանքների ժամանակ գազը սպառողներին է մատակարարվելու Ադրբեջանի տարածքով մինչև Վրաստանի հետ սահման», – նշվում է «Գազպրոմ էքսպորտ»–ի հաղորդագրության մեջ։
Աշխատանքներն իրականացվելու են մոտ 3 շաբաթ, որոնց ավարտից հետո գազի մատակարարումը կիրականացվի նախկին երթուղով` Ռուսաստանի և Վրաստանի սահմանով։
2020թ.–ին «Գազպրոմը» Հայաստան է մատակարարել 2,209մլրդ խ.մ. գազ, 2021թ.–ի հունվարին մատակարարումն ավելացել է 9%–ով` մինչև 310մլն խ.մ.։ 2020թ.–ի դեկտեմբերին «Գազպրոմ էքսպորտն» ու «Գազպրոմ Արմենիան» երկարացրել են Հայաստան գազի մատակարարումը միայն 2021թ.–ի առաջին եռամսյակի համար։
Հայաստան ռուսական գազի մատակարարման պայմանները քննարկվում են «Գազպրոմ» ընկերության վարչության նախագահ Ալեքսեյ Միլերի և ՀՀ փոխվարչապետ Մհեր Գրիգորյանի մակարդակով։
Հայաստանը գազ է մատակարարում նաև Իրանից, բայց փոքր ծավալներով և բացառապես էլեկտրաէներգիայով փոխանակման ծրագրի շրջանակում։ Հիմա կողմերն իրականացնում են խորհրդակցություններ նոր պայմանագրի ստորագրման պայմանների և ժամկետների մասին (գործող պայմանագիրը նախատեսված է մինչև 2026թ.)։
«Գազպրոմ Արմենիա» ՓԲԸ–ն «Գազպրոմ» ընկերության 100%–անոց դուստր ընկերությունն է, գազ է մատակարարում Հայաստանի ներքին շուկա։ Ընկերությունը ևս իրականացնում է գազի տեղափոխում, պահպանում և տեղաբաշխում, գազատրանսպորտային համակարգի և հզորությունների ընդլայնում, գազի պահպանում ստորգետնյա պահեստներում։–0–
