ԵՐԵՎԱՆ, 29 դեկտեմբերի./Նովոստի–Արմենիա/. Հայաստանը ներառվել է երջանկության ամենացածր ցուցիչով երկրների տասնյակում։ Այս մասին են վկայում հարցման տվյալները, որն անցկացվել է Gallup International անկախ հետազոտական գործակալությունների միջազգային ասոցիացիայի և «Ռոմիր» հետազոտական հոլդինգի կողմից։
Ինչպես նշվում է «Նովոստի–Արմենիա» գործակալությանը տրամադրած «Ռոմիր» հոլդինգի տվյալներում, հարցման ընթացքում Հայաստանի բնակիչների 42%–ը նշել է, որ «ոչ գոհ է, ոչ էլ դժգոհ» իր կյանքով, գոհ չէ 14%–ը, շատ դժգոհ է 5%–ը։
Միաժամանակ իր կյանքից գոհ է Հայաստանի բնակիչների 30%–ը, շատ գոհ է 9%–ը։
Երջանկության ցուցիչը գոհ և դժգոհ կյանքի տարբերությունն է։ Այս ցուցանիշով Հայաստանը կիսել է վերջից 7–րդ տեղը Ուկրաինայի հետ` առաջ անցնելով միայն Թուրքիային (19), Ռուսաստանին (18), Իրաքին (17), Հոնկոնգին (11), Աֆղանստանին (9) և Գաանային (2)։
Երջանիկ երկրների թոփ հնգյակում են Կոլումբիան (+79), Ղազախստանը (+76), Ալբանիան (+74). Մալազիան (+73) և Ադրբեջանը (+70)։
«Պետք է հասկանալ, որ համավարակը միայն դարձել է գործընացների կատալիզատոր, որոնք սկսվել են իրենից շատ առաջ։ Դեգլոբալիզացումը սկսվել է դեռևս Թրամփից առաջ։ Մեր կյանքի նկատմամբ թվային վերահսկողությունը ևս սկսվել է մինչև 2020թ.–ը։ Պարադոքս է նաև այն, որ համավարակը միավորեց ժողովրդավարական և ավտորիտար ռեժիմները, դրանք բոլորը հիմա սկսել են հիմնվել վերահսկողության և դիտարկման վրա։ Համավարակը միայն մարտավարական խնդիր է։ Մեզ հիմա, ինչպես երբևէ, անհրաժեշտ են նոր ուղենիշեր։ Պետք է մտածենք ապագայի մասին», – հայտարարել է սոցիոլոգիական գիտությունների դոկտոր, «Ռոմիրի» նախագահ, Mile group–ի հիմնադիր, Gallup International–ի փոխնախագահ Անդրեյ Միլեխինը։
Gallup International–ի և «Ռոմիրի»
հետազոտությունն անցկացվել է «Տարվա վերջ» (End of the Year) Երկիր մոլորակի բնակիչների ամենամյա գլոբալ հարցման շրջանակում։ Հետազոտողների հարցերին պատասխանել է ավելի քան 41 հազար մարդ աշխարհի 44 երկրներից։ Այսպիսով, նրանց կարծիքը կարելի է տարածել Երկիր մոլորակի բոլոր բնակիչների վրա։–0–
