Հայաստանում կորոնավիրուսի հետ կապված իրավիճակը կայուն է, ԱՆ–ն հորդորում է պահպանել հակահամաճարակային կանոնները

ԵՐԵՎԱՆ, 23 հունվարի./Նովոստի–Արմենիա/. Հայաստանում կորոնավիրուսային հիվանդության (COVID-19) համաճարակային իրավիճակը ներկայումս կայուն է, հաղորդում է ՀՀ առողջապահության նախարարությունը:


Վարակի տարածման ռիսկը նվազեցնելու համար հանրապետության ամբողջ տարածքում կարանտինը երկարաձգվել է ևս 6 ամսով։ Դրա հետ մեկտեղ որոշ սահմանափակումներ մեղմացվել են:

Կայուն իրավիճակը պահպանելու և վարակի տարածման ռիսկն ավելի նվազեցնելու նպատակով շարունակում է կարևոր մնալ հակահամաճարակային կանոնների պահպանումը:

ԱՆ–ից զգուշացնում են, որ մեր երկիրը դեռևս գտնվում է կորոնավիրուսային հիվանդության դեմ պայքարում։

«Այդ իսկ պատճառով հորդորում ենք լինել զգոն և շարունակել պահպանել հակահամաճարակային կանոնները, այն է` կրել դիմակ, պահել առնվազն 1,5 մետր հեռավորություն և հետևել ձեռքերի հիգիենային։ Հետևելով այս կանոններին` մենք հնարավորություն կունենանք կանխել հիվանդության տարածումն ու վերադառնալ բնականոն կյանքին», – նշում են ԱՆ–ից։

Հունվարի 23-ի, ժամը 11:00-ի դրությամբ հաստատվել է կորոնավիրուսային հիվանդության ընդհանուր 165909 դեպք, որոնցից 154535-ն` առողջացած, 3034-ը` մահվան ելքով։–0–