ՀՀ առողջապահության առաջին նախարարը մեկնաբանել է Հայաստանում աշնանը սպասվող կորոնավիրուսի 2–րդ ալիքի հավանականությունը (ՎԻԴԵՈ)
15:21
18 Սեպտեմբերի 2020
ԵՐԵՎԱՆ, 18 սեպտեմբերի./Նովոստի–Արմենիա/. ՀՀ առողջապահության առաջին նախարար, բժշկական գիտությունների դոկտոր, պրոֆեսոր Միհրան Նազարեթյանը «Նովոստի–Արմենիա» գործակալության Youtube–յան ալիքով հեռարձակվող «Հատուկ կարծիք» հաղորդաշարի ընթացքում խոսել է Հայաստանում աշնանը սպասվող կորոնավիրուսի երկրորդ ալիքի հավանականության մասին։
Նրա խոսքով ցրտերի ընթացքում, երբ եղանակը պաղում է, վիրուսները շատանում են։
«Նոյեմբեր–դեկտեմբերին շատանում են գրիպի և գրիպաձև ընթացող հիվանդությունները։ Անպայման չի, որ դա լինի կորոնավիրուս։ Ես չգիտեմ երկրորդ ալիք (կորոնավիրուսի, խմբգր.) կլինի, թե չի լինի։ Եվ որևէ մեկը չի կարող վստահ ասել, որ դա երկրորդ ալիք է։ Դրա համար փաստեր են պետք, իսկ փաստեր չկան, որովհետև սա առաջին անգամ է», – ասաց Նազարեթյանը`հավելելով, որ կարող է լինի երկրորդ ալիք, կարող է չլինի։
Загружается новость ... "Лево"
Նրա խոսքով, հնարավոր է հիվանդացողների թիվը բարձրանա, բայց շատ դժվար է նման պնդում անել, որ Հայաստանում կա երկրորդ ալիք։
«Մարդիկ հակված են հիվանդությունների։ Եվ մանավանդ այն մարդիկ, ովքեր ունեն ուղեկցող հիվանդություններ, նրանք ավելի հակված են նմանատիպ հիվանդություններով հիվանդանալու», – ասաց Նազարեթյանը։
ՀՀ առողջապահության առաջին նախարարը նշեց նաև, որ պետք չէ վախեցնել մարդկանց երկրորդ ալիքով, սակայն միաժամանակ պետք չէ մտածել, որ այս ամենը նորից չի լինի։
«Ես կարծում եմ, որ կորոնավիրուսի հետ կապված այս իրավիճակը դեռ կշարունակվի մի որոշ ժամանակ։ Ակնկալում եմ, որ դեռ եկող տարի մենք կարող ենք հանդիպել ու խոսել այս հարցերի շուրջ», – ասաց Նազարեթյանը` նշելով, որ կորոնավիրուսն ինչ–որ տեղ դառնում է կենսակերպի նման մի բան։
Նա որպես օրինակ բերեց Աֆրիկայում գտնվող երկրները։
«Օրինակ Հյուսիսային Աֆրիկայում, Հարավային Աֆրիկայում կան տեղեր, որտեղ մալարիան տարածված հիվանդություն է։ Մարդիկ այնտեղ ապրում են մալարիայով և այլ հիվանդություններով։ Նրանք ոնց որ համակերպվել են, կատարվում է բուժում, պրոֆիլակտիկա։ Ինձ մոտ էլ այնպիսի տպավորություն է, որ այս կորոնավիրուսը որոշակի ժամանակից հետո սովորական բան պիտի դառնա։ Ու եթե մենք սկսեցինք ավելի լավ վերաբերվել կանխարգելիչ գործողություններին, և եթե թողարկվեցին արդյունավետ վակցինաներ, ոչ թե խաբկանքներ, այն ժամանակ մենք կհաղթահարենք սա», – նշեց բժիշկը։
Նրա խոսքով, այս վիրուսը չի վերանալու, պարզապես նրա դեմ պայքարն է ուժեղանալու։
Սեպտեմբերի 18-ի, ժամը 11:00-ի դրությամբ հաստատվել է կորոնավիրուսային հիվանդության ընդհանուր 46910 դեպք, որոնցից 42369-ն` առողջացած, 926-ը` մահվան ելքով:–0–