ԵՐԵՎԱՆ, 17 դեկտեմբերի./Նովոստի–Արմենիա/. Բարձրագույն որակավորման կոմիտեն առաջարկում է փոփոխություններ իրականացնել իրավական դաշտում գիտական պաշտպանություններում գրագողությունների խնդրի բացահայտման և լուծման համար:
Այս մասին այսօր հրավիրված ասուլիսում ասաց Բարձրագույն որակավորման կոմիտեի նախագահ Կարեն Քեռյանը:
Նրա խոսքով՝ պետք է սահմանվի աստիճանազրկման կարգ:
Загружается новость ... "Лево"
«Այդ կարգը հնարավորություն կտա պաշտպանությունից հետո, նույնիսկ տարիներ անց, եթե հայտնաբերվի գրագողություն, անձին զրկել գիտական աստիճանից: Պետք է աշխատանք տանել այդ կարգն ունենալու համար: Այս առաջարկն ընդգրկված է ՀՀ կառավարության միջոցառումների ծրագրում»,-ասաց Քեռյանը:
Բարձրագույն որակավորման կոմիտեի նախագահի խոսքով, դա չի նշանակում, որ այդ կարգը պետք է գիշեր-ցերեկ օգտագործվի ու աստիճանազրկման հարյուրավոր դեպքեր լինեն: Այն ավելի շատ պետք է ծառայի որպես կանխարգելիչ գործիք:
«Հայցորդը կհասկանա, որ նույնիսկ եթե հիմա իրեն հաջողվի պաշտպանել, ապա միևնույն է, թեկուզ տարիներ անց, այդ գրագողությունը կբացահայտվի ու նա կզրկվի իր գիտական աստիճանից»,-ասաց Քեռյանը:
Աստիճանազրկման կարգից բացի, նրա կարծիքով անհրաժեշտ է նաև ներմուծել գրագողությունը բացահայտող ծրագրի արդիականացումն ու այն հասանելի դարձնել ավելի լայն շերտի, մասնավորապես, գիտական հոդվածներ հրապարակող պարբերականներին:-0-
