Բացարձակապես սուտ է, որ Տավուշից թեկուզ 1 միլիմետր տարածք վիճարկման ներքո է․ Փաշինյան

ԵՐԵՎԱՆ, 10 ապրիլի․/Նովոստի–Արմենիա/․ Բացարձակապես սուտ է և հերյուրանք, որ Տավուշի մարզից թեկուզ 1 միլիմետր տարածք վիճարկման ներքո է, այդպիսի բան լինել չի կարող, ասաց ՀՀ վարչապետ Նիկոլ Փաշինյանն՝ այսօր ԱԺ–ում պատասխանելով լրագրողների հարցերին։

«Դա քաղաքական միավորներ հավաքելու նպատակով որոշ ապապետական ուժերի կողմից վճարովի ձևով տարածվող սուտ է», – ասաց Փաշինյանը։

Փաշինյանի խոսքով մինչև չհամաձայնեցվեն, թե ո՞ր քարտեզով են առաջնորդվելու կողմերը, ոչ մի պրոցես սկսվել չի կարող։

«Խորհրդային Հայաստանի ու Հայաստանի տարածքում երբեք Բաղանիս-Այրում, Ներքին Ոսկեպար անունով գյուղեր չեն եղել։ ՀՀ տարածքում եղել է ու կլինի Ոսկեպար անունով ու Բաղանիս անունով գյուղ»,- ասաց Փաշինյանը։

Անդրադառնալով այդ տարածքները Ադրբեջանին հանձնելու դեպքում անվտանգության երաշխիքների բացակայությանը՝ Փաշինյանն ասաց, որ երաշխիքը նշանակում է բացառում, այդպիսի երաշխիք մարդկության պատմության մեջ ոչ եղել է, ո՛չ կա, ո՛չ էլ երբևէ կլինի։