Առաջիկայում կորոնավիրուսի թվերի շարունակական աճ ենք կանխատեսում.Փաշինյան

ԵՐԵՎԱՆ, 3 փետրվարի./Նովոստի-Արմենիա/. Այս պահի դրությամբ կորոնավիրուսով վարակված 1 543 քաղաքացի է հոսպիտալացված, որոնցից պատվաստված են 256-ը կամ 16.6 %-ը։ Այս մասին այսօր կառավարության հերթական նիստում հայտարարեց վարչապետ Նիկոլ Փաշինյանը:

  Նրա խոսքով՝ ակնհայտ է պատվաստման էական ազդեցությունը վարակվածների նկատմամբ:

«Առաջիկայում մենք թվերի շարունակական աճ ենք կանխատեսում: Մենք ունենք որոշակիի ալգորիթմներ, սակայն հույս ունենք, որ մեր կանխատեսած նշաձողից ավելի բարձր չեն լինի թվերը: Եվ հիմա միջոցներ ենք ձեռնարկում, որպեսզի պատշաճ ձևով այս ալիքին ևս դիմակայենք»,-ասաց Փաշինյանը:


Առողջապահության նախարար Անահիտ Ավանեսյանն էլ իր հերթին նշեց, որ օրական դրական թեստերի շրջանակներում ունեն 4% հոսպիտալացման կարիք, բժշկական համակարգը դեռևս լարված ռեժիմով է աշխատում։

«Հիվանդացությունից հետո պետք է երեք ամիս անցնի պատվաստման համար, այդ պատճառով էլ պատվաստման գործընթացն իրենց դեպքում մի փոքր կերկարի: Իսկ հանրապետությունում 18 տարեկանից բարձր առաջին պատվաստումը ստացել է 46.3%-ը, իսկ ամբողջական պատվաստում 37%-ն է ստացել»,-ասաց Ավանեսյանը։

Նիկոլ Փաշինյանն էլ հավելեց, որ պատվաստման տոկոսը շատ ցածր է, և պետք է քայլեր ձեռնարկեն, որպեսզի այն աճի։ Նա նշեց՝ աշխատող քաղաքացիների շրջանում առաջին դեղաչափի ընդունման աճ կա, և երրորդ դեղաչափը ևս շատ կարևոր է, սակայն չաշխատող քաղաքացիների պատվաստումային ցուցանիշերը դեռևս շարունակում են ցածր մնալ:

Նշենք, որ օրերսգրանցվում է կորոնավիրուսի նոր դեպքերի հակառեկորդ: Այսօր գրանցվել է 4388 նոր դեպք, կատարվել է 9595 թեստավորում, առողջացել է 2359 մարդ, մահացել է 5 մարդ:-0-